Kumin Wimbledon finalist Nick Kyrgios-a’n inkhel pawimawhah a thiamna a lantir leh a. Player sawihlawh a ni chungin a talent tha lantirin inkhel hmuhnawm takah US Open champion lai Daniil Medvedev chu a hneh.
Pathianni zanah kum 27 mi Australian star hian ball a vuak thiamzia leh tennis player in a ball a vuak theih dan ang ‘technique’ a neih kimzia a lantir a. Round of 16 inkhelah 7-6 (13-11) 3-6 6-3 6-2 in hnehna a chang.
Kum 26 mi Medvedev hi he result avang hian US Open zawhah a world number one nihna chhuhsak a ni dawn.
Talent nei tha mahse court chhung leh pawn lama a nungchang avanga a nih tur ang nei thei lo nia sawi thin Kyrgios hian amah selna hi a lo pawm tawh thin a. Kuminah Wimbledon final a khelh hnuah America lama hard court-ah a chetha chhunzawm.
Washington a inelnaah a champion hnuah US Open a a thlen thui ber tum a hmang mek. “Daniil hi champion lai a ni a, a lakah beiseina a sang. Inkhel hmuhnawm tak a ni dawn a, tunhnaiah ka kheltha hle. Ka inkhelh danah ka lungawi a, selna hrang hrangte hi thil dawnsawn awlsam a ni bik lo.” tiin a chak hnuah Kyrgios chuan a sawi.
Quarter-final ah Kyrgios hian Russian mi tho Karen Khachanov a hmachhawn dawn a, ani hian ablo Carreno Busta chu 4-6 6-3 6-1 4-6 6-3 in a hneh.