League season tha taka bul an tan hnuah AS Roma an chesual chiang hle a. Udinese in an lakah zahngaihna tel miah lovin goal hmaah an che a, 4-0 in an sawp.
Pathianni zana Dacia Arena a inkhelah Roma hian Serie A a an match ngana an khel a. Tottenham in an lakluh thar Destiny Udogie chuan minute 5-naah mualneitu lam tan goal hmahruai a khung nghal.
Hnehna chang se league hmahruaitu ni thei Roma in tihsual an ngah an tuar a. Udogie goal khung tur defender Rick Karsdorp leh goalkeeper Rui Patricio te ball inpek tur a lo lak khalh atanga lut a ni.
Minute 56-naah midfielder Lazar Samardzic chuan penalty area pawn atangin an goal hnihna a khung a. Midfielder dang Roberto Pereyra chuan an goal thumna minute 75-naah a khung a. Minute sarih a liam leh hnuah Sandi Lovric chuan an goal hnuhnung ber Pereyra siamsak atangin a khung.
Inkhel zawhah Roma manager Jose Mourinho chuan Serie A team a enkawl tawh tuma a tlawm chian ber tum a hman hnuah, “Match li 1-0 a tlawm aiin match khat 4-0 a tlawm ka thlang zawk.” tiin a sawi a.
“Kan goal chhuahte kha mimal tihsual atanga intan vek a ni a. Mahse ka thlir danah chuan mimal ni lovin team pum anga kan tihsual a ni.” tiin an tlarhnung lam chetsual a mawhpuh duh lo.