Liz Truss chu UK prime minister thar tur a ni dawn tih Thawhtanni khan puan a ni ta a, rorel lai, Conservative party chhunga hruaitu tur inthlanna rei tak kalpui a nih hnuah hnehna a chang ta a ni.
An ramin ni tin khawsakna man sang zel te, industry lama chet chhiatna an tawn mek lai leh an sum hlutna pawh a tlakhniam mek laiin chanvo hautak tak a chelh dawn a ni.
Truss-i hian a khingpui tawp ber, finance minister hlui, Rishi Sunak chu vote 81,326 – 60,399 in a hneh a. Boris Johnson-a’n July thlaa a bân tur thu a puan hnuah nipui chhunga inthlangin an inkara inbeihna pawh nasa tak a thleng a ni.
“Kan tho chhuak leh thei a ni tih hi kum hnih chhungin kan tilang ang. Chhiah nasa taka tihniamin kan sum leh pai dinhmun a kân leh theihna turin ka bei ang,” tiin Truss-i chuan a tling tih puan a nih hnuah a sawi.
“Energy-a harsatna kan tawh te, mipuiin energy bill an buaipuina te ka enpui ang a; mahse, energy kan chawk luhna kawnga hun rei tak harsatna kan neihte hi en fel a ni ang,” a ti.
Kum 47 mi, Truss-i hi UK-in prime minister atana hmeichhia an neih pathumna tur niin Theresa May leh Margaret Thatcher-i hnung a zui dawn a ni.
Prime minister thar tur hming a chian rualin Johnson-a’n thuneihna a hlan dan tur pawh kalpui nghal zung zung a ni a. Ani hi thla eng emaw zat chhung a kaihhruai sorkar rintawk lohna leh a mi mal thilah buaina (scandal) neuh neuh a neih hnuah July khan a bân tur a tichiang a ni.
Thawhlehni hian Scotland-a awm mek, Queen Elizabeth hmuin dan angin a bânna a thehlut ang a. Truss-i’n zuiin lalnu hian sorkar siam turin a lo sawm dawn a ni.
Johnson-a’n a bân tur a puan ruala a thlaktu tura rinkai ber ni sa, Truss-i hi kum 2015-a an ram inthlanpui neih hnuah Conservatives prime minister palina tur a ni der tawh.
Kum sarih pawh la liam lo chhung hian an ram hian buaina hrang hrang an tawng a; tuna a lian ber chu thil man sang chak lutuk niin July thla khan a san lai ber tawngin 10.1% zetin a sang.
Truss-i hian a campaign laiin chhiah lak thin tihhniam leh sorkar hnathawkte hautak lutuk pawh tihziaawma kal dan thlak a tum hle a, a bikin amah pawh a lo thawh tawhna, finance ministry chu thlak a tum hle.
Truss-i hian eptuten Conservative sorkar sorkar chhe lutukin kum 12 chhunga an thlen nia an sawi, an ramin harsatna a tawh hrang hrang a hmachhawn a ngai dawn a. Indin thar tura hun rei tak duh, a man pek tur pawh sang tak leh harsa tak a ni hlawm dawn a. Mi tam tak chuan a hun pangngai aia hmaa inthlan huaihawt phah a ngaih hial an ring a; mahse, Truss-i hian chu em chu thlentir a tum lo tih a sawi.
Tunge Liz Truss?
Oxford, England-a July 26, 1975-a piang, Mary Elizabeth Truss hi Conservative Party hruaitu atana thlan niin Queen-in prime minister atana a ruat mai hmabak a ni ta a. A chanvo thar tur a chelh hma hian kum 2021 atang khan Secretary of State for Foreign, Commonwealth & Development Affairs a ni mek a, kum 2019 atang khan Women & Equalities Minister a ni bawk.
Conservative Party hmingin kum 2010 atang khan South West Norfolk bialtu Member of Parliament (MP) a la ni ngar ngar a. Prime minister hlui – David Cameron, May leh Johnson-a sorkarah te khan mawhphurhna lian leh pawimawh tak tak a lo chelh tawh thin.
Truss-i hian Merton College, Oxford atanga lehkha zir chhuakin Oxford University Liberal Democrats-ah pawh president a lo ni tawh thin a, kum 1996-a a graduate rual khan Conservative Party a zawm a ni.
Eizawnna lamah chuan Shell leh Cable & Wireless-ah hna a lo thawk tawh thin a, think tank pakhat, Reform-ah deputy director a ni bawk.
Kum 2010-a an ram inthlanpuiah khan South West Norfolk bialah dingin thlan tlin a ni a, MP thar mai a nih avangin thawm nei lian lo mah se an party inrelbawlna bakah an sorkar kal dan hrang hrangte thlak a tulzia sawi chhuaktu zinga a tel fo va; heng zingah hian childcare, mathematics zirna leh sum dinhmun chungchanga insiam that an ngaihzia a tlangau thin.
Free Enterprise Group of Conservative MPs a din a, ama pual bakah mi dangte nen lehkhabu leh paper an chhuah fo va, heng zingah hian After the Coalition (2011) leh Britannia Unchained (2012) te pawh a tel.
Truss-i hian State for Childcare & Education-ah kum 2012 leh 2014 inkar khan Parliamentary Under-Secretary a ni thin a, Cameron-a a sorkara a cabinet a siksawi khan Secretary of State for the Environment, Food & Rural Affairs chantir a ni ta a. Hetih lai leh a hnu hret hi an ramin European Union chhuahsan a tum lai vel kha niin mipui ngaihdan lakah pawh an chhuahsan theih nana campaigner langsar a ni nghe nghe.
Cameron-a’n secretary-a a ruat hnuah hi chuan sorkar thar zelah pawh chanvo lian leh pawimawh a chang zui ta zel a ni.