St Anthony’s Higher Secondary School in nimina Zirtirtute Ni lawmna an buatsaihna I&PR Minister Lalruatkima’n hman puiin, “Zirtirtu chu thalai te rilru leh ngaihtuahna buatsaihtute an ni a, kan ram hma hun siam tute an ni,” a ti.
Vanapa Hall-a hun hmanah Minister Lalruatkima hian, “Kan piantirh atangin kan nu leh pa te hnen atangin zirtirna kan dawng tan a, chu chu kan chhungril ngaihtuahnaah intuhin kan nun a nghawng thui hle,” a ti a; zirtirtu te’n zirlai bu leh nunphung zirlai pawimawh tak tak te an zirtir a, rilru put hmang leh khua leh tui tha ni turin kawng an kawhhmuh thin tih a sawi.
Zirtirtute pawimawh zia sawiin, “Zirlai bu min zirtir mai bakah zirtirtute chuan kan harsatna min hriatpui a, a sutkian theih dan kawng min zawnpui a, nun kawnga harsatna awm te hmachhawn dan thlengin min zirtir a ni,” Lalruatkima’n a ti.
St. Anthony’s Higher Secondary School hian an zirlai, HSLC & HSSLC result chhuaka letter leh distinction hmu chin te an chawimawi a. Nepali subject topper Subita Shaerma hnenah lawmpuina Rs 30,000 an hlan bawk.
He hunah hian MBSE Chairman JH Zoremthanga chu khual zahawm niin a tel pui bawk a ni.