Aizawl: Chief Minister Zoramthanga chuan tun hnaiah Department Vehicle Purchase Board (DVPB) remtihna pawh la loa hmanhmawh thila CM support car tur Jeep Compass pakhat lei a nih chhan chu an lirthei kawl lai a kal theih ngang tawh loh vang a nih thu a sawi.
Nimina Assembly Session neihah ZPM Legislature Party Leader Lalduhoma’n, “DVPB rem tihna lak hmain Jeep Compass pakhat lei a ni tih hi a dik em?” tih a zawhna chu chhangin, General Administration Department (GAD) changtu Zorama chuan, “Dik e, Jeep Compass hi mamawhna bik leh tul bik thil avanga lei lawk (advanced purchased) a ni a, DVPB pawhin a pawmpui tawh,” a ti.
Hemi chunga zawhna dang a chhan belh bakah lirthei lei a nih dante sawifiahin Zorama chuan, CM support car atana an lei, Jeep Compas pakhat chu Rs. 24,23,901 man a nih thu sawiin, a man chu advance-a pek a ni a, GAD budget head atanga lei tura hmalak mek a nih thu a sawi.
CM Zorama chuan, an sorkar hlima minister 11-te hman tur lirthei 22 an lei tum khan CM motor erawh hman theih naw nawa ngaih a nih avangin lei a ni lo tih sawiin, hetihlai hian hun eng emaw chen a kal hnuah, a lirthei hman chu kawng chhoa nam ngai khawpte a nih avangin Jeep Compass lei a nih thu a sawi a, “Chumi hnuah support car pakhat, a hma lama, ‘I thlak lo ang u,’ ka tih kha a kal thei ngang ta lo a, lei loh theih a ni ta lo a, chumi a nih vang chuan Jeep Compass bawk lei leh a ni,” a ti.
Zorama chuan a motor kawl pahnih, a tira an thlak ve loh kha a hnu deuhah thlak a ngai ve ve ta a, chumi thlakna atan chuan Jeep Compass chu an lei ta tih a sawi.
Kum 2019-a minister 11-te lirthei tur an lei dan sawi bawkin, Hyundai Ver 11 leh Scorpio 11 lei a ni a, heng lirthei 22 lei nan Rs 316,36,539 sen a nih thu a sawi bawk.