Aizawl: Champhai Tlangsama grep tui sawr, kohhran serh leh sang, Sacrament atana hmang chhunzawm zel turin nimin khan Baptist Church of Mizoram (BCM) leh Champhai Grape Growers Society chuan inremna thuthlung an ziak.
A vawi thumna atana thawhhona thuthlung hi Champhai Tlangsama grep tui sawrna hmunah ziah niin, BCM aiawhin General Secretary Rev R Lalbiakliana’n hming a ziak a, Champhai Grape Growers Society aiawhin an chairman HS Vanlalfalzuala’n hming a ziak hnan ve thung.
Horticulture aiawha inremna hriatpuitu hi C Lalremsiama, Joint Director, a ni.
Sacramental wine inleisak chungchangah BCM leh Champhai-a grep chingtute hian November 11, 2016 leh October 5, 2019 khan inremna thuthlung an lo ziak tawh a. Zu khapna dan thar kalpui a nih khan he inremna hi kalpui zui zel theih a ni ta lo thung.
Tun hnaiah Mizoram sorkara cabinet thutkhawma thutlukna thar angin grep wine hralh chhuah theih a nih dawn tak avangin tun hma lama inremna an lo neih tawh chu thar thawh a ni leh ta a ni.
Inremna thuthlung ziak a nih hmaa inkhawm tawi neihah Rev. R Lalbiakliana, Gen. Secy, BCM chuan sakhaw serh leh sanga hman atan tha tawk nia an hriat avangin Mizorama grep tui sawrchhuah hi sacrament atan an hmang tih sawiin, kohhran dang pawhin hmang ve thei se a duh thu a sawi.