Bharat Biotech-in an siam chhuah, hriau hman ngai lo chi, Covid-19 laka invenna damdawi chu rikruma hman atan India chuan a pawm leh ta.
Union Health Minister Mansukh Mandaviya chuan Thawhlehni khan hei hi puangin vaccine hi hnara thlawr chi a nih thu leh a him bakah a thawk tha niin a sawi.
“India-in COVID-19 a beihnaa titang lehzualtu! Bharat Biotech-in ChAd36-SARS-CoV-S COVID-19 (Chimpanzee Adenovirus Vectored) nasal vaccine chu kum 18 chung lamin emergency-a an hman turin a pawm,” tiin minister hian Twitter-ah a tar lang.
“Hei hian hripui laka a huhova kan thawhnaah rahbi thar min kaitir a. India hian Prime Minister Narendra Modi kaihhruaina hnuaiah science lamah tan a la nasa a, COVID-19 pawh kan hneh ang,” tiin a tar lang bawk.
Tuna hnar atanga inpek chi invenna hi tlang hri leng pangngaia hnar leh ka atanga damdawi thlawr ang chi, chuap thleng lut thei ang chi tho a ni a, hnara thlawr dangte ang thovin a kalkawng a inang dawn a ni.
A siamtu company chuan hriau ngai lo chi invenna chu pek mai a awlsam dawn a, damdawi thiam zir chhuak kher pawh a pe turin a ngai dawn lo tih an sawi.
Hei bakah hian invenna danga hriau hman hnu sawngbawl a ngaih tawh dawn loh avangin a awlsam lehzual a; puitling tan pawha a awlsam ang bawkin naupang hnena pek pawh a awlsam dawn a; a siam dan hmangah a hautak lo zawk bawk niin an sawi.
September, 2020 khan Bharat Biotech hian Washington University School of Medicine, St. Louis nen novel chimp- adenovirus an tih laka invenna, dose khat chauh lak ngai hnara thlawr chi Covid-19 vaccine siam tur hian inremna an lo ziak tawh a ni.
Nikum January khan company chuan sorkar laipui hnuaia damdawi viltu hnenah mihringa enchhinna kalpui phalna an lo dil tawh bawk.
Phase 3 trial chu ram chhunga hmun kuaah mi 900 dawn hnenah kalpui a ni tih he damdawi chungchang hriate chuan an sawi.
Enchhinna hi All India Institute of Medical Sciences, Delhi leh Patna (Bihar) bakah Aatman Hopsital, Ahmedabad (Gujarat); PGIMS, Rohtak (Haryana); leh Prakhar Hospital, Kanpur leh Rana Hospital, Gorakhpur (Uttar Pradesh)-ah neih a ni.