Naupangte data buaipui fuh lohna vangin Instagram hian $Maktaduai 400 chawi thei dinhmunah a ding mek.
Ireland rama data vawng a, enkawltu te chuan Instagram-ah naupangte data a buaipui leh kalpuinaah thil fuh tawk lo leh dik lo tak tak a awm tiin, an fine ta nghek mai a ni.
Hetih lai hian Instagram enkawltu Meta Platform Inc chuan pawisa tam tham tak fine an nihna chungchangah appeal an thehlut dawn a, sum tam tak chawi theihna pumpelh an inbeisei hle.
Ireland sorkar hian kum 2020 atang tawh khan kum 13 leh 17 inkar naupangte’n Instagram an hman dan an lo zirchiang tawh a, an mahni puala businessa account hawn phalsaknaah hian a hmangtute phone number emaw email address te chu account-ah hmuh theih tura dahchhuah a ni.
Ireland sorkar hnuaia Data Protection Commissioner (DPC) thupangtu chuan, “Zirtawpni kalta khan thutlukna fel fai tak kan siam tawh a, hetah hian $Maktaduai 400 chawi theihna a tel,” a ti.