Aizawl: Excise & Narcotics Minister Dr K Beichhua chuan Mizoram atanga thar chhuah grape hmanga wine siam atangin chhiah lak a ni dawn tih house a hrilh.
Nimina Assembly Session-ah ZPM Legislature Party member VL Zaithanzama zawhna leh member dangte zawh belhna chhangin excise minister chuan, “Rules ang chuan excise duty tax lak a ni dawn,” a ti.
He rules hnuaiah hian wine siamna turin Mizorama thar grape chauh a huam dawn tih sawiin, rampawn atanga grape lak luhte chu wine atan siam phal a nih dawn lo tih a sawi.
Excise minister chuan tun hnaia Council of Ministers thukhawmin a pawm tak, Grape Wine Rules chu law department-in an endik leh a, a tih tur angte a tih zawh hunah notication chhuahin gazzete a nih tur thu a sawi a ni.
May 27, 2022-a Excise Force-ten Millennium Centre, Aizawl atanga grape wine an mante pek kir a nih dawn leh dawn loh chungchang zawhna chu chhangin, grape wine rules gazzete tihchhuah a nih hnuah an hotuten a tih dan tur an la ngaihtuah tur a ni thu Dr K Beichhua chuan a sawi.
Grape wine an mansakte chu MLP Act tlawh chhana Rs 3,000 chawitir an ni tih leh chu sum chu pe kir tura tihna a awm lo tih a sawi a; kuthnathawktute grape thar chhuah chu sorkarin engtia kalpui zel nge a tum tih zawhna chhangin hemi chungchang hi excise department an hriat loh thu a sawi bawk a ni.