Mizoram Legislative Assembly pariatna thutkhawm vawi 10-na, ni thum awh tur chu nimin khan tan a ni a, digital hmanga session kalpui theihna tur, National eVidhan Application (NEVA) hman tan a ni.
Session hi Assembly Speaker Lalrinliana Sailo kaihhruaiin chawhma dar 10:30-ah tan a ni a, assembly house-a lehkha hman ngai lo tur leh digital hmanna tura hmalakna, NEVA chu a taka kalpui tan a nih thu member-te hriatah a puang.
Speaker chuan house member tin dawhkanah iPad dah tan a nih thu sawiin, hemi atan hian Ministry of Parliamentary Affairs atangin Rs vaibelchhe 8 leh nuai 70 chuang dawn a ni a, state sorkarin a do letna tur pawh an pe nghal vat tih a sawi.
NEVA chu lehkha hman ngai lo tura hmalakna ni mah se lehkhate pawh a la hman theih tho tih sawiin, chutihrualin e-book-ah house document-te a awm vek avangin member-te chu hmang tangkai turin a ngen.
Nimina session neih tan nia zawhna leh chhanna hun hman a nih hnuah Minister Lalchamliana’n paper pahnih, The Mizoram Private Security Agencies Rules, 2022 leh Notifications Issued Under the Mizoram Goods & Services Tax, 2017 te a pharh bakah The Mizoram Goods & Services Tax (Amendment) Bill, 2022 chu house pawmpui tura pharhin, member tam zawkin an duh avangin pawm a ni.
Power Minsiter R Lalzirliana’n paper pathum – JERC for the State of Manipur & Mizoram Annual Report 11, 12 leh 13-na a pharh bakah speaker in tun session neih meka Business Advisory Committee-in report a siam chu a tar lang bawk.
Ruahman lawk dan chuan assembly thutkhawm hi vawiin chawhma dar 10:30-ah chhunzawm leh a ni a, naktuk Ningani thleng a awh dawn a ni.