Aizawl: Mizoram sorkarin Myanmar atanga Mizorama lut raltlante a chhinchhiah zingah a tam zawkin ID Card an nei tawh.
Thawhlehnia Assembly Session-ah ZPM Legislature Party (ZLP) member VL Zaithanzama zawhna ziaka Home Minister Lalchamliana’n a chhan danin, August 20, 2022 thlenga Deputy Commissioner-ten an chhinchhiah, home department-a an thehluhah chuan Mizoramah raltlan 29,253 an awm mek.
Myanmar atanga Mizorama lut raltlante chhinchhiah hna hi Mizoram sorkarin in zo thawkhat tawh mah se, raltlan te hi lut chhuak an nih reng avangin a tahtawla chhinchhiah hna hi kalpui chhunzawm zel a nih thu home minister hian a chhang.
Home Minister Lalchamliana hian August 20, 2022 thlenga Deputy Commission te’n an chhinchhiah, Home department-a an theh luh ang chuan raltlan te hi a zavaiin 30,401 chhinchhiah an ni tawh a, heng zingah ID card hi 30,177 pekchhuah a nih tawh thu a sawi bawk.