England right-back Reece James chuan Chelsea a cham chhunzawm turin contract thar a ziak a. Kum 2028 thleng Stamford Bridge-ah a inkhel dawn.
Chelsea chherchhuah James hian kum 2020 January thla khan kum 2025 thleng daih contract ziak tawh mahse club tana a pawimawhna a san telh telh avangin Blues in thlun ngheh an duh.
Kum 22 mi England right-back hian season liamta khan inelna hrang hrangah vawi 39 inkhelin goal ruk a khung bakah midang goal khung tur vawi 11 a siamsak a. Chelsea goal nawr tihlauhawmtu zing ami a ni.
Kum 2019 September thla khan Blues first team tan a inkhel tan a, an tan vawi 128 a inkhel tawh. Hemi hma hian loan in Wigan Athletic hnenah season khat a inchherhriam tawh bawk.
“Contract thar ka ziah avangin ka hlim hle a. Ka hmalam hre lo mah ila min ti phur em em a, chona lo awm turte hmachhawn tawh ka chak hle.”
“Kum ruk ka nihin club ka zawm a, he club hi kan tan an ni bawk. He club a cham reng hi ka duh.” tiin a sawi.