Hollywood actor pahnih Ben Stiller leh Sean Penn te chu Ukraine lamtang an nihna ual-au taka puangchhuak a, an thlawp tlat vangin Russia-in an rama mikhual tawh ngai loh tur list-ah a dah ta.
Thawhtanni khan Russia sorkara foreign ministry chuan an rama an mikhual tawh loh tur list thar an tihchhuahah mi 25 langin, hetah hian politician, sumdawng hausa leh industrialist te an tel.
Hei hi tunhnai maia US President Joe Biden-ai’n Russia laka hrekna thar a puan hnu lawka chhanletna a ngaih a ni.
Sean leh Ben te hi Russia-in Hollywood star a hrek hmasak ber an ni lova, May thla liam ta khan US rama mi chal lang leh pawimawh tak takte hrekna tichhuak tawhin, heng mite hi an ramah an mikhual leh ngai tawh lovang, an ti.
Hriat theih chinaah US khua leh tui mi 1,000 vel zet ‘ban’ an ni mek a; US President Biden, Vice President Kamala Harris, Facebook neitu Mark Zuckerberg leh Hollywood veteran actor Morgan te chu langsar zual an ni.
Penn leh Stiller te hian Russia-in a luhchlh mek Ukraine an thlawp thu hi an puangchhuak reng a, Penn phei hi chu Kyiv khawpuia documentary an siam lai takin Russia hian a run tan kha a ni a, a taka hmutu leh tawngtu a ni nghe nghe.
June thla khan Ukraine President Volodymyr Zelensky hmu in, a thlawp tlat thu a hrilh. Hemi hnu pawh hian zirna lam bakah raltlan te buaipuina tur kawngah sum tam tak a thawkchhuak a, kawng tinrengin a buaipui a ni ber.
Ben pawh hi June khan UNHCR Goodwill Ambassador a nihna angin Ukraine President hi hmaichhanah a hmu ve bawk a, a ‘Hero’ dik tak a nih thu a hrilh.