Atalanta in Italy-ah point hnih a hma hruai turin hnehna an chang a. Thawhtanni zanah table mawngphah a awm Monza hmachhawnin 2-0 in an chak.
U-Power Stadium-ah mikhual team Atalanta hian first half-ah uluk taka an goal veng Monza tlarhnung thiah an harsat hman hle a. Kaithar team in an mualah point khat tal hmuh an tum.
Second half-ah erawh Atalanta an veng tluan thei lova, minute 57-naah Ademola Lookman siamsak atangin Rasmus Hojlund chuan an goal hmahruai a khung a. Minute 8 hnuah Lookman-a ball pet luh chu Monza defender Marlon chuan an lamah a ti lut palh.
Atalanta coach Gian Piero Gasperini chuan inkhel zawhah, “A tirah risk la in na takin kan nawr a, fuh nghal lo mahse a tawpah hnehna kan chang ta tho.”
“Atalanta chanchinah league hmahruaitu awmchhun hi kan la ni ngai lova, tuna kan dinhmun a ding tura player-te leh staff te inpekna hi a fakawm. Bergamo mipui, club fans te leh kan zavai atana thil lawmawm leh tha tak a ni.” tiin an chak hnuah a sawi a. Goal khungtu kum 19 mi Hojlund chu a fak bawk.