Aizawl: Rural Development Minister Lalruatkima chuan kum 2019 hnu lamah BADP atan Mizoram sorkarin Rs nuai 8,000 chuang a hmuh tawh thu house a hrilh.
Nimina Assembly Session-ah Congress Legislature Party Leader Zodintluanga Ralte zawhna chhangin sorkarin kum 2019-20 leh 2020-21 chhungin BADP atan Rs nuai 8,077.55 a nih thu a sawi.
Zawtna zawttu, CLP leader chuan BADP hnate chu BDO leh EE directorate-ten an thawk vek thu a sawi leh heng hnathawhnaa hlep zaa 25 chu changtu an awm em tih a zawh belh.
RD Minister chuan BADP central share 2018-19 estimate-ah chuan contractor-in a hnathawhna atanga a hlep leh over head charge atan zaa 15 chu hnathawhna sum atangin lak tur a ni tih leh hetiang hian dan ang taka kalpui a nih thu a sawi.
BADP guideline thar ber, 2020-a tihchhuahah BADP hnate chu NGO leh private institution-ah pek phal a ni lo a, guideline angin vawiin thlengin state level impelmenting agency (SLIA)-ten an thawk tih a sawi bawk.
MNF Legislature Party Secretary L Thangmawia zawh belhna chhang bawkin RD minister chuan, Ngopa BDO-in bawlhhlawh leh thlai hnah atanga meihawl siamna tur, Micro level Biomass Briquette DPR an theh luh chu pawm a, hemi atan hian pawisa pawh an ruahman tawh tih a sawi.
Ruatkima chuan, “Kan bawhlhhlawh sawngbawl dan chungchangah hian tawih theih leh thei lote kan thliar a, hma kan sawn viau mai a, kan environment chhe zel tur ven nan pawh a tawihte hi sawngbawla meihawl anga hman theih dan tur an rawn duang a, hei hi Mizorama a hmasa ber tur a ni,” a ti bawk.