Aizawl : Thawhlehni khan an thudawn bawhzuiin District Special Branch (DSB) Aizawl DEF-in Armed veng-a thingpui dawr pakhat atangin methamphetamine (meth) thahnem tak leh a neitu nia puh mi pahnih an man.
DSB Aizawl DEF-in ruihhlo meth an mante hi polythene bag 38 zet chhunga mum 3,80,000 a awm a. Bag pakhat zelah mum 10,000 a awm a ni. An ruihhlo man hi international market-ah Rs vaibelchhe 9.5 hu niin, tualchhung bazar-ah Rs nuai 114 hu a ni.
DSB Aizawl DEF-in Armed Veng-a Laldinsanga thingpui dawr an dap atangin meth hi an man a, hemi kaihhnawiha mawhphurtu leh ruihhlo neitua puh Laldika, Khawmawi, Myanmar nia insawi man tel bawkin, an pahnih hian Aizawl Police Station-ah thubuai siamsak an ni a. He thubuai kaihhnawih hi chhuizui mek a ni bawk.