Europe huap club inelna lian ber tan zanah beisei loh result nei club pahnih an awm a. An manager-ten an tuar zui ve ve. Chelsea leh RB Leipzig te an hneh ngei tura ngaih lakah an tlawm a. Thomas Tuchel leh Domenico Tedesco te ban an ni nghal.
Tuchel-a hun a tawp
Stadion Maksimir-ah Chelsea an leng lut a, vawi hnih UCL champion tawh Chelsea hma a ding hi Croatia champion nimahsela team inthlau tak tura ngaih an ni.
Mahse he inelna a match 43 an khelh tawh atanga vawi nga chauh chak Croatian club in minute 13-naah Mislav Orsic hmangin goal mawi an khung a. Hei hi a tawp thlengin Blues in an sut thei lova, an khung belh teuh zawk.
Chelsea tan Pierre-Emerick Aubameyang chuan goal khat khung mahse offside avanga pawm a ni lova, a bakah erawh beisei angin a che lo.
Nilaini khan Chelsea neitu tharten club an leina atanga ni 100-naah chiah Tuchel hi an ban a. Head coach thar lakluh a hun tawh nia an hriat avanga thutlukna siam an ni tih an sawi.
Club thuchhuahah, “Club neitute chuan he club hi hmalam panpui an tum zel a, hei vang hian inthlak danglam hun tak a ni ah an ngai. Thomas hi Chelsea chanchin-ah a thi tawh dawn lova, UEFA Champions League, UEFA Super Cup leh FIFA Club World Cup chawi thei a ni.” an ti.
Tam tak tan Tuchel ban hi thil mak erawh a ni lova, a hnuhma tha mahse tunhnaiah lang lo lamah engkim a fuh vek lo.
Pre-season inbuatsaih lai atang tawhin a squad a sawisel fova, a player-te nen an inkar a tha vek lo nia sawi a awm. Hei chauh hi ni lovin referee sawisel vang leh Antonio Conte nena an inbakkaih avanga hrem a ni bawk.
A thlaktu atan Chelsea hian Brighton a team tha tak duangtu Graham Potter an ngaihven nghal a. Kum 47 mi hi a club lamin Chelsea hotute nen inbiak phalna an pe tawh a, Boehly nen hmaichhanah nizan khan an indawr tura ngaih a ni.
Ani bakah Mauricio Pochettino leh Zinedine Zidane bakah Brendan Rodgers te sawi lan a ni bawk.
Tedesco pawh
Red Bull Arena-ah German club hausa RB Leipzig chuan Shakhtar Donetsk an mikhual a, 4-1 a an tlawm hnuah Domenico Tedesco chu an ban.
Tedesco khan nikum December khan Leipzig hi enkawl tanin 11-na a awmlai chu palina a nihpui a, a vawikhat nan German Cup chawipuiin Germany a an trophy lian hmasa ber a lakpui.
Tedesco hi thlak turin Borussia Dortmund coach hlui Marco Rose chu sawi a ni mek.