India-a eptu party lian ber, Congress hruaitu chuan chhim tawp atanga hmar tawp thleng kawng a zawh tur chu bul a tan.
Rahul Gandhi-a hova Congress party-in kawng an zawhah hian mi 100 chuang an tel a. Thla nga chhungin km 3,570-a thui kalin state 12 an tlawh ang.
An zin kawngah hian Gandhi-a hian chhunah mite kawm kualin zanah riahbuk sak chawpah a riak thin dawn a. Kawng an zawh hi website-a live-a tihchhuah tur niin an thuchah ken nena inhmeh hla tihrik a ni bawk ang.
Bharat Jodo Yatra (Unite India March) hi politics thil avanga kalpui a ni a, Prime Minister Narendra Modi-a kaihhruai BJP sorkar beihna tur a ni.
Sorkar beihna piah lamah hian an party dinhmun hniam mek zel leh an hruaitute tihlar thar lehna atana Congress hian an huaihawt a ni a. “Mipui thu kan ngaithla ang, engmah zirtirna leh sawi kan nei dawn lo,” tiin an hruaitu, Jairam Ramesh chuan a sawi.
Mipui thu ngaihthlak hi politics-ah thil hlawk tak a ni a. Kum 2014-a Modi-a’n thuneihna a chan atangin Congress hi hemi lamah hian an hlawhchham nasa hle.
Kum 2014 hnuah BJP hian parliament inthlanpui vawi hnihah chiang taka hnehna an chan tawh a. Congress erawh hemi hnuah state inthlan vawi 45-ah vawi 40-ah a chak lo zawkah an tang zel a, state pahnihah ro an la rel hram a, hengah pawh hian an MLA-ten party dangah an pakaisan hlauvin inveng takin an awm.
Congress hian BJP laaka anmahni vote-tute an chân teuh teuh chu a chhan hriat a ni lo va. Hetih lai hian Gandhi-a hi duhkhawp lohna a awm lian nia ngaihna erawh a awm thung.
Congress tan hian politics khel thiam leh sum thawhtu nei tha BJP hi beih hautak a ni hrim hrim a. Mi tam tak chuan miin an rinngam hruaitu tun tuma kawng an zawh tur hi a hruai a nih chuan ram pum huapa inthehlar leh theihna tha tak niin an ngai.
Gandhi-a hi miin an khamkhawp tawh lo nia ngaihna hi a lian a. Mi 1,20,000 hnena ngaihdan lakna tharah chuan 9% chauhvin inthlan leha prime minister ni turin an ring a, Modi-a erawh a zahve lai a tling thung.
“Hruaitu rinngam nen lo chuan vantlanga campaign neih hi a hlawhtling ngai chuang lo. Kum 20 liam ta chhungin Rahul Gandhi-a hian vantlang a khawih phak tawh lo,” tiin BJP national vice president Baijayant Jay Panda chuan a sawi.
Hei tak hi tun tum kawng zawhin Gandhi-a dinhmun a thehlar leh theihna tur nia ngaih a ni a. Political scientist Zoya Hasan chuan Congress-in kawng zawh an huaihawt chu miin ‘Gandhi hi ram hruaitu a ni tih tinung lehtu a ni thei’ niin a sawi.
Gandhi-a hova Bharat Jodo Yatra hian an party a tinung zo dawn em tih leh amah pawh a tilar thar leh thei dawn em tih sawi lawk a har a. An party hruaitu, Shashi Tharoor-a chuan kawng zawh tawp rualin Indian-te rilru chu a hahdam huai dawn chuang lo tih a sawi a. Mi thenkhat chuan Gandhi-a thuchah kenin amah leh an party a invawrh dan turchu a hril dawn niin an sawi.