Myanmar ram buaina avanga Farkawna raltlana awmte chu Farkawn Dawr nei Association ngenna angin dawr eng chi mah siam phalsak an ni lo.
Farkawn atanga thudawn danin tun dinhmunah Farkawnah hian raltlan dawr nei pariat an awm mek a, heng raltlan dawrte hi ei chawp thil, thawmhnaw, bike part dawr, petrol zuar, lu mehna dawr leh khawlaia inpho an ni.
Hetianga raltlanten dawr an siam avang hian khaw chhung dawr rate chungchangah harsatna a awm bakah dawr an siam atang hian ruihhlo a hluar hle nia hriain Farkawn Dawr nei Association chuan Village Level Committee on Myanmar Refugee hnenah, ‘Farkawn khaw chhungah raltlanten dawr an siam chu phal tawh loh nise,’ tiin ziakin an thlen.
Village Level Committee on Myanmar Refugee chuan Dawr nei Association thu thlen chu ngaihtuahin Farkawn khaw chhunga raltlanten dawr an siam chu khawtlang himna atan a tha tawk lo niin an hria a, VC-te kaihhruainain khaw chhunga pawl hrang hrangte thu rawn lak a ni bawk.
Chung pawl hrang hrangte thu rawn chu Thawhtanni zan khan VC kaihhruainain Fiara-tui Runah ngaihtuah niin, tun dinhmunah Farkawn khawchhungah raltlanten dawr an siam chu khawtlang tan a him tawk lo nia ngaiin phalsak loh nise, tuna an dawr bungraw zawrh laite pawh thla khat chhunga tiral vek tura hriattir nise an ti.
Raltlante enkawl zel dan tur leh inkaihhruaina pawh Village Level Committee on Myanmar Refugee kutah awm se an ti bawk.
Tun dinhmunah Farkawnah hian raltlan chhungkua 178 awmin mi 883 vel an awm a, primary atanga higher secondary school thleng lehkhazir mi 230 an awm mek bawk a ni.