Khawvel football a attacker ngaihven hlawh ber pahnihten tun season bul an tan that an chhunzawm a. Thawhlehni zanah goal hnih ve ve khungin an team te an chakpui.
Manchester City striker Erling Haaland chuan tan goal 12 a khung tling tawh a. Sevilla lakah goal hnih khungin 4-0 in an chak.
Ramón Sánchez-Pizjuán-ah Norwegian striker in Kevin de Bruyne ball cross atangin goal hmahruai a khung a. Second half-ah Sevilla goalkeeper Yassine Bounou ball dan per chu a goal hnihna turin a khung a. Hemi hma hian England midfielder Phil Foden chuan an goal thumna khungin Ruben Dias-a’n an goal hnuhnung ber a khung ve thung.
Julen Lopetegui-a pawlte hi Spain-ah pawh beisei pha lo taka bul tan an ni a. City in an inkhel an thunun hneh a, goal tam zawk hun khung thei an ni.
City manager Pep Guardiola chuan, “An insiamthat dawn lai vel takin Phil-a’n goal hnihna a khung kha a pawimawh hle. Kha khan a ti awlsam.”
“Erling a awm avangin kan hmanhmawh lutuk thin a, hlauhawm tak taka a awm thin avangin ball pek kan hmanhmawh thin. Kan dawhtheih deuh a ngai a, ball tha kan siamsak a pawimawh.” tiin a sawi.
Mbappe pawh
France forward Kylian Mbappe pawhin first half-ah Paris Saint-Germain tan goal hnih a khung a. An mikhual Juventus 2-1 in an hneh.
Parc des Princes-ah Neymar nena inkawpin goal mawi an khung a, Brazil forward in Juve defence ball a vawrh khum a, laklawh awm miah lovin minute 5-naah Mbappe-a’n goal-ah a khung.
Minute 22-naah an goal hnihna a khung leh a. Weston McKennie chuan Juve goal a khung ve bawk.
Mbappe hian tun season-ah inelna hrang hrangah match 6 atangin goal 9 a khung tawh.
Benzema a inhliam
Champion lai Real Madrid in fakawm taka khel Celtic lakah 3-0 in hnehna an chang a. Chiang takin chak mahse an lawm a kim lo.
Blancos star striker Karim Benzema chu darkar chanve an khel hman tihin khup hliam avangin lakchhuah a ngai a. A hliam hi eng anga na nge hriat a la ni lo.
Celtic Park-ah Blancos in tan hian Vinicius Junior, Luka Modric leh Eden Hazard ten goal an khung.