Aizawl : MNF Adviser Robert Romawia Royte chuan kum tam tak Congress sorkar lai ai khan tuna MNF term reilote chhungin GST a tam zawk niin a sawi.
Nilainia Aizawl South-I Block huaihawta Bethlehem Vengthlang YMA Hall-a mi thar lawm luhna hun buatsaihah thu sawiin Robert Romawia Royte hian, MNF term reilote chhung hian GST a tam thu sawiin, “GST a lo luh tam chuan hmasawnna hnathawh a tam a ni. Congress kum tam tak sorkar lai ai khan tunah hian GST a lut tam zawk,” a ti.
Robert Romawia Royte hian Mizoram Congress chungchang sawiin, “An President thar Lalsawta ai thu mi pathum vel an awm a, MADC-a Congress MDC te’n MNF nena sorkar an siam chungchangah pawh ama thu a dintlang pui ngam lo,” a ti bawk.
Lalduhoma nena inkhaikhinin Robert Romawia Royte hian, “Tun hnaiah Pu Duhoma chuan number leh figure a lawm lut a, keini chuan mihring tak tak kan lawm lut a ni,” tia sawiin, ZPM Leader Lalduhoma’n Rajiv Nagar-ah mi thar 40 chuang a lawm lut nia an sawi hnu lawka VC by-election-ah ZPM candidate khan vote paruk chiah a hmu tih sawiin, MNF-a membership pe ngeite anni chuan an lawm lut tih a sawi.
MNF thuchhuah chuan, Aizawl South-I huam chhung veng hrang hrang atangin Congress, ZPM leh party tan lam nei lo atangin mi thar 485 an lawm lut niin a tar lang.