PC party President Lalhmangaiha Sailo a ban tak avanga PC party kal zel dan tur ngaihtuaha nimina PC party hruaitute thukhawmin PC party Sr Vice President nilai Vanlalruata chu an party lo kaihhruai turin Acting President atan an ruat.
PC party hruaitute chuan “Kan President Pu Lalhmangaiha Sailo-in ṭhalai zawk tan a nihna a ken tak avangin OB Meeting chuan lungrual takin Acting President atan Pu Vanlalruata Sr. Vice President kan ruat” an ti a. Nimina PC Party OB te thukhawm hian General Assembly hun atan tun thla ni 22 an ruat nghal a, General Assembly-ah hian an party hotu tur chu an thlang dawn niin an sawi.
PC party Acting President atana ruat thar Vanlalruata chuan, “PC Party President Pu Lalhmangaiha Sailo-in President nihna a chawlhsan chungchangah zawhna tam tak kan dawng a. Pu Lalhmangaiha’n a sawi tawh angin kum upa lam leh taksa chak lo chho zel a nih avang te, ṭhalai zawkte kuta party hruai hna kentir a duh tawh avang te a ni ber” tiin, “hetiang rilru a pu hi ka ngaisangin ka zah takzet a ni,” a ti.
Vanlalruata chuan PC party mite chibai bukin, kum 2023 MLA inthlanpui an hmachhawn turah sorkarna fawng chelhtu pawimawh takah PC party mi leh sa te thlenpui ngei an tum thu a sawi nawn leh a. “Thahnemngai taka PC party leh kan ram tana hma lo la zel turin hmuntina PC mite ka chah a ni” a ti bawk.