- Ramhluna Hnamte
Hman deuh tawhah khan Lelte Weekly ah Pu T.C.Jonunsanga’n ‘Pu Hmaa Titi – ‘Laldarin Sap-Sangau titi’ leh Zunleng’ lehkhabu lo chhuak thuai tur atanga a hlehthlak ka chhiar a, ngaihnawm ka tiin a nghahhlelhawm ka ti kher mai. Kha lehkhabu kha chhuak tawh tak maw. FB atangin Pu C.S.Lalhmangaiha(Pu Hmaa) chu September ni 4 khan chatuan ram pan a min kalsan thu ka chhiar a, a vui ni September ni 5 pawh khan a thih thu hi ka lo la hre ta lo cheu a, hei vawiin September ni 6 hian ka lo hre ve chauh a, ka ui ve em avangin a uina thu tlem ka han ziak ve hnuhnawh a nih hi.
Leitlangpui a ka awm lai khan kan inhmelhriat tha ve hle a,Writers’ Club-ah te pawh khan committee member niin min rawn tel puiin min ti phuisui hle thin a. A ni hi mi ropui, mahni in ring tawk, saptawngte mai mai chu mahni tawng ang chiah a hmang ve mai thin kha a ni a, a ngaihnawm a, a hlimawm thin hle bawk. Amah hi Champhai lam chhuak niin ka hria a. Khatia Vanawia vanglai a a doctrine a lo man fuh ve hlauh avang khan khang hun lai a mi tam tak angin Lalzahabara khawpui Sangau bul Thaltlang khua-ah khan Zoram hmar lam atangin a han pem lut ve ta rawih kha a ni a. A ni ang mi fel leh vengva ta chu Lalzahabara meuh pawhin lo ngai pawimawhin dinhmun pawimawh tak lo pe in ‘LALDARIN SAP’ hming /title a lo pe a ‘Thilnung pali’ zing a pakhat te hial kha a han ni ve ta kha a ni a. Khatia Laldarin Sap a nihna hun engemaw chen a hman hnu khan Lal Zahabara(Vanawia) leh a pawlte hi chhuahsan in Lungleiah a pem ta ni maiin ka hria a. Mi thiam ta na na chu zirtirtu hna thawkin a hun te kha a hmang leh ta a ni. Lunglei Electric vengah in bengbelin veng neitu ber leh Lunglei pa em em in, in ti mikhual miah lovin a awm ta a, Lunglei mipui pawhin an khaw pa original ang thlapin an pawmin an lo lawm hle a ni. Han in hmuh nikhua hi chuan a ti ti ko tlangah kan dak doh doh a, kal san hleih theih a ni thin lo. A frank em em na leh dik ni a a hriat huai taka a sawi pawp ngam thin te kha Pu Hmaa ka ngaihsanna a ni.
Vawikhat chu a khaw hlui Champhaiah a han zin a ni awm a(ama min hrilh dan in), a rawn haw leh lamah MST Bus ah a chuang a, pa pakhat hian khang hun lai a Lunglei leh chhimlam hmusit tak a fiamthu thawh nan a an hman thin hmang khan, ‘Lunglei leh chhim ho chuan T(Tri) hi an han uar khawp a, Isua pawh kha ‘Thruama’ an ti nia’ tiin ti fuh in ti tak khan a pawt lar lar a, an nuih pui ham ham a. Chutah, Champhai pa lo ni thin, rinna avanga Laldarin Sap lalthutphah a thu ngat tawh,Thilnung pali zing a pakhat lo ni ngat tawh bawk, tuna Lunglei Electric veng pa lo ni ta thin chuan a tuar ta tlat lo. A tho lawk a, chu pa pawt zawt zawt, chhim lam hmusitna rim nam ni a ngaih theih fiamthu thawh a chu a en ta ran mai. ‘Thianpa, nangni ho pawh hian T hi in uar leh lutuk a, Isua nu Mari pawh kha Tawni in ti a ni lo’m ni kha?’ a han ti ve ta ngat mai chu, ‘Chu pa pawt zawt zawt-a chu a hawi lawl lawl mai a sin’ Pu Hmaa chuan a tia lawm. Tun hma a Champhai pa kha a lo in ti chhim/Lunglei pa ve hle tawh a lo ni awm e. Isua Thruama tih chung chang thu hi ka hre fo tawh thin a, fiamthu a nihnaah ka lo nuih liam pui mai mai thin am mahse Champhai MST Bus a chuang ve pakhat, Champhai pa lo ni thin, Lunglri pa nit a Pu Hmaa chuan a lo la thu takin pai tawih a har a lo ti hle chu a nih si hi!!
Writers’ Club, Lunglei-ah khan kum 30 chuang Canada ram a awm tawh, Canada khawpui a Beauty Parlour pawh nei hial Pi Vanlalzapi Higgins(L) kha kan member a ni bawk a. A ni kha Mizote zinga rei taka wm tawh lo a nih avangin saptawnga tawng kha nuam a ti zawk mah a. Vawikhat chu kan meeting naah Pu Hmaa kha a lo tel ve bawk a, Pi Zapi chu saptawng in a han ti ti pui ta tak tak mai a le, Pi Zapi pawhin ‘Zotawngin ti ti tawh mai ang’ a ti ruai mai a ni. Saptawng kha a ngam a, a nal bawk a, keini ho anga tawng dikloh hlau leh grammar dik lo hman hlau hi a ni ve lo. A tawng mai a, a sawi tum kha a hriat theih vek a, tawng nalh loh leh dik loh lam kha a buaipui ve lem lo. Kha kha Pu Hmaa ka ngaihsanna pakhat a ni.
Ti ti a thiam em avang khan subject in ang reng pawh sawi ila, Pu Hmaa sawi chu a ngaihnawm bik tlat thin. September ni 4 khan khawvel chhuahsanin a tuk September ni 5 chhun dar 12 ah Lunglei Electric veng a a chenna inah Rev. R.Lalawmpuia, Presbyterian Church of India Pastor in a vui liam ta a ni.
Pu Hmaa ka ui hle mai. A chhungte Pathianin awm pui mawlh rawhse.