Aizawl : Special Court, ND&PS Act Judge Dr HTC Lalrinchhana chuan heroin vanga man Vanlalvena, Bawngkawn, Lunglei Road, Aizawl chu thiam loh chan tirin kum 10 chhung tang turin a hrem.
September 1, 2017 khan Excise & Narcotics department hian Vanlalvena kut atangin heroin gram 279 manin thubuai siamsak a ni a. Court in a thubuai hi a ngaihtuah hnuah Narcotic Drugs and Psychotropic Substances (ND&PS) Act, 1985 tlawhchhanin thiam loh a chan tir a. Heroin gram 279 (Commercial quantity) neih vanga man leh thiamloh chantir chu kum 10 chhung rim taka tang tur leh pawisa Rs 1,00,000 chawi turin Court thutlukna a puang a ni.
He thubuai-ah hian Mizoram sorkar aiawha Court-a ding chu Lalremthangi, Addl. Public Prosecutor leh Zoremthanga, Asst. Public Prosecutor te an ni.