Caroline Garcia chuan US Open a American mipui beiseina tleirawl Coco Gauff zinkawng chu a titawp a. 6-3 6-4 in hnehna a chang.
Nilaini zinga inkhelah seeded number 17 hauhtu kum 28 mi Garcia hian a khingpui kum 18 lakah hian tihsual nei mang miah lovin a khel tluan a. Seeded number 12 changtu Gauff tan hneh a harsa.
Tunhnaia che tha tluang tak Garcia hian Flushing Meadows-ah kumin hian set a la hloh miah lova. A zawnin match 13 tunhnaia a chakna a ni.
Cincinnati-ah US Open inbuatsaihna ni pahfawmin WTA 1000 tournament-ah kum nga chhunga a vawikhatna atan a lo champion tawh bawk.
Tun tum hi Grand Slam quarter-final a khelh vawi hnihna chauh a ni a. Mahse Arthur Ashe Stadium-ah zam lo hle in Gauff-i nawrtu ah a tang tluan a. A khingpui tan inthlahdulna hun a siam lo.
US Open semi-final ah hian Tunisian mi Ons Jabeur a hmachhawn leh dawn a. Ani hian 6-4 7-6 (7-4) in seeded number 5 Ajla Tomljanovic a hneh ve thung.
Kum 28 mi Jabeur hi Open era tennis a African hmeichhe zinga Flushing Meadows a semi-final khel hmasa ber a ni dawn a. A khingpui Australian mi nena chak tuma an inkhel a hautak hle.