Kumin US Open a champion lai hnehtu Nick Kyrgios-a’n semi-final a thleng zo lova. Russian player Karen Khachanov lakah hnehna sual chhuak thei lovin quarter-final inkhel hautak leh hmuhnawmah a tlawm.
Nilaini zingkara New York a inkhelah kum 27 mi hian a khingpui seeded number 27 hauhtu hi 7-5 4-6 7-5 6-7 (3-7) 6-4 in a hneh lova. Set khatna an khelh laiin a malpuiah harsatna tenau nei a enkawl ngaiin a awm a, chutihrualin Khachanov a kheltha hle bawk.
World number 31 ni lai Khachanov hian inkhel boruak sang takah chiai miah lovin a tawp thleng a khel a. A talbuai duh lohna avang hian break point vawi kua a khingpui in a neih atang vawi sarih a dang hlawhtling.
Kyrgios-a’n set khatnaah harsatna nei mahse set hnihnaah a buai lo tih lantirin a thiamzia a pholang a. Kumin Wimbledon final khel Kyrgios hian set thumnaah pawh ball vaw tha theiin dinhmun thaah ding mahse hun pawimawhah vuak sual a nei leh thin a. Hei hian ti tang ulhin a tawp a khar fuh thei lo.
Set a hloh leh hnuah thinchhe ve tak Kyrgios-a’n ngai a awh thei tawh lova. A khingpui a buai ve duh loh avangin Khachanov a chak.
“Inkhel danglam angreng tak a ni a, mahse hetiang hi ka lo beisei lawk deuh a ni. Set nga inkhelh ka peih a, kan inkhel a hautak. Mahse Nick hneh tur chuan hetiang hi inpeih a ngai.” tiin a chak hnuah Khachanov chuan a sawi.
Kum 26 mi hian Casper Ruud a hmachhawn leh dawn a. Seeded number 13 hauhtu Matteo Berrettini 6-1 6-4 7-6 (7-4) in Norwegian mi Ruud hian a khingpui hi a hneh.
Kumin French Open final khel kum 23 mi hi world number one thar ni thei zingah a tel.