Typhoon Hinnamnor-in a thlen ruah sur nasa lutuk avanga South Korea-a lei hnuai lirthei hunna hmunah tui lut nasa taka tang mi pasarih an thi.
An car la chhuak tura an lut chu tui nasa tak lutin nangchingin an chhuak leh thei ta lo hlawm a ni.
Thawktute chuan mi pahnih an chhanchhuak tih an sawi a, darkar 12 zet ceiling pipe-ah an lo uai tang tang tang nia sawi an ni.
Kumina thawk tawha na ber, Typhoon Hinnamnor hian tun kar tir khan South Korea hi a nuai a ni.
Chhanchhuah hna thawktute chuan lei hnuai lirthei hunnaa tui nu tak khat vek chu chhungah an lut a ni.
News site Yonhap chuan chhanchhuahte leh thite hi an vaiin lirthei hunna chung apartment building-a cheng an ni a, Thawhlehni tukah khan management office-in an lirthei hun dah chhuak tura an hriattir zawma lut an ni.
Dam chhuak mi pahnih, mipa kum 30 vel leh hmeichhia kum 50 mi vel hi an dinhmun a ngaihtuahawm loh.
President Yoon Suk-yeol chuan chhiatna thleng pawi a tih thu a sawi a. “He vanduaina thleng avang hian nizan pawh ka mu thei lo,” a ti.
Chhiatna thlenna hmun hi special disaster zone a nih thu leh Nilaini tlai lamah a tlawh nghal tur thu a sawi bawk.
Chhiatna thlenna, Pohang khawpui hi an rama chhiatna thlenna nasa ber a ni a. Typhoon avang hian tuipui kama khualbuk chu a chim a, tumah thi leh hliam erawh an awm lo nia hriat a ni.
Typhoon Hinnamnor avang hian mi 10 vel an thi tawh a, Thawhtanni leh Thawhlehni khan South Korea chhim leh khawchhak lam vaukam hrutin tui pawh a tifawn sang hle a, thli chak tak a ken bakah ruah a tam hle.
Chhim lama khawpui dang, Busan leh Ulsan-ah pawh chhiatna a thlen nual tho va. Kawngpui a ping a, tukverh darthlalang a tikeh leh thingkung tlukarte a awm.
South Korea hi Asia khawchhak lam ram dangte ang bawkin tun hnaiah ruah an dawng nasa hle a, hetih rual hian khaw lum uchuak pawh an tuar ve tho.
August thla tir khan ruah tam tak surin khawpui lian tam takah tui a tilian a, khawpui ber, Seoul pawh an buai hle a. He tui lian avang hian mi pariat an thi a, pathum chu lei hnuaia apartment-a tui lut vang an ni.