Aizawl : Aizawl District Congress Committee (ADCC) huaihawtin nimin khan Aizawl City Block Joint Conference neih a ni. He huna thusawitu Mizoram Pradesh Congress Committee (MPCC) President Lalsawta chuan mipuiin Congress party insiam tha mek chu an ring tan mek tih a sawi.
Lal Thanhawla Auditorium-a Aizawl khawpui huam chhunga block leh unit hruaitute puala inkhawm buatsaihah Lalsawta hian, “Kan duhthusam pha chiah lo mah ila, LC leh VC By-election result a tha thawkhat a, Congress party insiamtha mek hi mipuiin min thlir a, min ring chho tan niin kan hria a, kan lawm em em a ni,” a ti.
“Nakum inthlan thlirin i chhiah pek tlingkhawm, dik lo taka an lo chheprelh hmang hian nangmah lei tuma thlemna i tawk dawn. I vote lei tumtu hian lei theih thil ang lekah a ngai che a nih hi. Nangmah a hmangaih vang che ni loin amah a inhmangaih a, a lo hausak belh theih nan sum a hmang a ni. Lei tumtute an lokal hunah chuan lo tizak rawh. Lo tibeidawng rawh u,” tiin Congress President hian vote lei chingte laka inthiarfihlim tura kalkhawmte a chah.
Lalsawta hian Congress party hruaitute chu Pathian duh dana nung tura chahin, “Pathian laka kan tlin lohzia leh ngaihdam ngai reng kan nih hi inhre reng ila, engmah chhuan tur nei lo kan nih angin Congress mipui hian kan sualte kan sim a, Pathian lam kan hawi a, Pathian kan auh chuan Ani chuan min lo ngaidam ang a, min tidam leh ang. Kan tum ber hi Pathian duh dan a nih phawt chuan Pathianin min tanpui ngei beisei ila. Pathian tanpui tlak nih i tum ang u,” a ti.
ADCC Vice President PC Lalhuapzauva kaihruai inkhawm hi MPCC President Lalsawta bakah Congress Party Office Bearer pahnih – Vice President Lal Thanzara leh Treasurer Zodintluanga te’n telpuiin, thu an sawi vek a. Kalkhawmte hian resolution panga an siam bawk.
RESOLUTION:
- Mizoram sorkar sum enkawl thiam loh avanga sorkar sum harsa em em te, a hun taka sorkar hnathawk ten hlawh an la thei lote hi kan dem tak zet a ni.
- Sorkar kalphung mumal loh avanga kum tam tak khawthlang lam, Hachhek tlangdung mipuiten eizawnna atana an lo hman Kuhva hralhna kawnga harsatna an tawk hi kan tawrhpui tak zet a. Sorkar hi mipui tana ding ngam tur leh dan ang taka kut hnathawktute thlai thar hralh a nih theih nan rang taka hma la turin kan phut a ni.
- Sorkar pawisak lohna leh dan bawhchhiatna tam lutuk hi pawi kan ti tak zet a. Sorkar rorelna-ah mipui zinga duhsak bik leh hleih neih bik lutuk anga lang awm thin hi pawi kan ti hle bawk.
- Dik taka sum enkawl a, sorkar tha leh mumal tak din turin MPCC Prcsident Pu Lalsawta hi kan ring tawk a. A hnung zuia a tha tichak turin theihtawp kan chhuah dawn a ni.
- MPCC President Pu Lalsawta’n a lo sawi tawh angin ‘That Loh Theih Lohna Bawm’ kalphung anga sorkar tha leh dik siam turin Congress Party-a lo awm tawh thin, engemaw avang a min chhuahsan ta zawng zawngte Congress Party-a lo kir leh vek turin kan sawm a ni.