German football club RB Leipzig chuan Nilaini a an head coach Domenico Tedesco an ban hnuah a thlaktu atan Marco Rose chu an lalut fel nghal.
Leipzig hi tun season-ah league match vawi nga khel tawhin vawi khat chiah hnehna an la chang a. Bundesliga-ah 11-na an ni mek.
Thawhlehni zanah UEFA Champions League a Ukrainian club Shakhtar Donetsk in 4-1 a an sawp nghal hnuah Tedesco hi a hna atangin an chawlhtir.
Rose hian Leipzig-ah hian kum hnih daih contract a ziak a. May thla khan a hna chelh hnuhnung ber Borussia Dortmund atangin chawlhtir a ni a. Hemi hma hian Borussia Moenchengladbach-ah fak hlawh takin hna a lo thawk tawh.
Kum 45 mi hi Leipzig in club kalphung an neih atangin a mikhual lo hle a. Red Bull hnuaia awm ve tho RB Salzburg-ah hna a lo thawh reng tawh thin.
Kum 2013 atanga 2017 khan Salzburg-ah an youth coach pawimawh a ni a, kum 2017 atanga 2019 khan head coach niin Austrian Cup vawikhat leh league title vawi hnih a lakpui.
A thlak tak Tedesco hian December thla khan Leipzig hi a enkawl tan chauh a. Hetihlai hian league-ah 11-naah awmin palina season tawpah a nihpui a. German Cup a chawipui bawk bakah UEFA Champions League khelpha turin a tlinpui.
Nimahsela tun season-ah beisei angin bul an tan lova. Vawi khat chauh hnehna an la chan bakah kar hmasa khan Eintracht Frankfurt in 4-0 in an sawp.
Rose hian naktuk zanah a club hlui Dortmund a hmachhawn nghal ang.