Aizawl : National Eye Donation Forthnight vawi 37-na chu nimin khan Eye Care Hospital, Dawrpui-ah khar a ni a. MJA Vice President Lalremsiama’n National Eye Donation Forthnight kharna hun hi a hmanpui.
MJA Vice President chuan midang tana mit pek kawnga Eye Bank-a thawktu hrang hrang te țhahnemngaih chhuanawm a tih thu sawiin, “an țhahnemngaihna avangin mi tam tak khaw hmuh te a lo fiah tawh a, an hmalakna a hlu a ni” a ti a. Eye donation chungchangah media lam mi ten theihtawp chhuah an inhuam thu leh an tangkai ve theihna tur te a awm a nih chuan inthlahrung lo turin thawktute a chah.
Mipui mamawhna a san em em tawh laia Eye Care Hospital lo ding pawh thil lawmawm tak a nih thu MJA Vice President chuan a sawi a. “Mizoram hmun hrang hrangah kawng hrang hrangin hma an la a, a thlawna mit entirna te buatsaihin, damdawi te an sem thin, an ni hmalakna pawh hi a hlu a ni” a ti bawk.
National Eye Donation Forthnight kharna inkhawmah hian Eye Bank-a thawk mithiam ten eye donation chungchanga hriat tur pawimawh hrang hrang te an sawi a. Report-a a lan danin 2008-a Eye Bank bultan a nih tanga kumin thlengin mit darthlalang tlak 938 an awm tawh a. Thih hnua midang tana mit pe tura intiam 8620 awmin, mit thlak ngai damlo inhriattir 362 an awm mek bawk a ni.