State Council of Educational Research and Training (SCERT)-in International Literacy Day denchhena Poetry Festival a buatsaiha zirlaite poem phuah dahkhawmna bu -Take Flight: A Collection of Children’s Poems- tih chu nimin khan Humarn Resource Development Board Vice Chairman L Thangmawia’n a tlangzarh.
L. Thangmawia chuan tunlai thalaite zingah thu leh hla tuipui tak tak an awm tih a hriat avanga lawmawm a tih thu sawiin, “hmanlai angin naupang pawnto te a rem tawh lova, nu leh pa ten mahni fate duh ang tawkin an zirlaite pawh kan enpui that hman tawh lohna khawvelah hian SCERT-in an talent haichhuahna hun tha tak a buatsaih thin hi a lawmawm a ni” a ti bawk.
Zirlaite poem phuah endiktute zing ami Prof. Margaret L. Pachuau chuan zirlaite poem phuah a hmuh dan te sawiin, SCERT-in kum 10 chhung Poetry Festival kumtin a huaihawt tawh leh chumia endiktu zinga a tel thin lawmawm a tih thu a sawi a. “Hun rei tak saptawng hman hi khawtlangah inthlahrunawm rum rum anga a lan thin laiin, saptawnga poem inziah siak SCERT in a huaihawt thin hi chutiang boruak tihrehna hmanraw zinga tangkai tak pakhat a nih ngei a rinawm a, poem chu hringnun tinuama, timuanawmtu a ni” a ti.
‘Take Flight: A Collection of Children’s Poems’ tlangzarh inkhawmah hian kum 2021-a SCERT buatsaih Poetry Festival-a lawman pakhatna dawngtu Ronald Kapsanga, St. Paul’s HSS zirlaiin a poem phuah a chhiarchhuk bawk a ni.