Real Madrid striker Karim Benzema chu thla khat vel a inkhel thei dawn lova. UEFA Champions League group stage inkhel a a inhliam avangin a chawlh rih a ngai dawn tih a club in an sawi chiang.
Thawhlehni zanah Real Madrid leh Celtic inkhelah France striker hi darkar chanve vel chauh khelmualah a awm hman a. A malpuiah tihrawl hliam a neih avangin Eden Hazard-a’n a thlak.
Benzema inhliam hi chawlh rei ngai tura rinna a lian hman a, nimahsela Madrid lam an hlauthawng lo. Nilaini khan a hliam hi ngun zawka en a nih hnuah thuchhuah an siam.
“Real Madrid Medical Services chuan kan player Karim Benzema hliam uluk taka kan endik hnuah a malpui dinglamah tihrawl leh tha hliam a awm a. Club in uluk takin a enkawl chhunzawm ang.” a ti.
France striker hi a club lamin a chawlh hun chhung tur sawi lo mahse kar thum atanga kar li vel chawl tura ngaih a ni a. Champions League a an group stage inkhel vawi hnihna turah a tel thei dawn lo tih a chiang nghal a. Shakhtar Donetsk a hmachhawn hman ang em tih zawhna a awm.