Indona atan bik $ mtd 675
United States chuan Ukraine leh a thawhpui ramte chu $ tluklehdingawn 2.7 dawna a puihna tur a pawm ta a, heng zinga $ maktaduai 675 chu Russia nena an indo meknaah Ukraine a puihna tur a ni.
Defence Secretary Lloyd Austin chuan ralthuama puihna tur hi Ramstein, Germany-a US air base-a a minister-pui eng emaw zat nen an thutkhawmnaah a puang.
Ralthuam an pek tur zingah hian howitzer, puak thei dang, Humvee vehicle, armoured ambulance leh tank beihna hmanrua te a tel.
US hian a hmain Ukraine hi sipai lam bikah $ tluklehdingawn 13 zeta pui turin a lo intiam tawh.
Biden-a sorkar chuan Ningani khan $ tluklehdingawn 2 chu hun rei zawk atan, Ukraine leh a thenawma awm ram 18-te himna atana hman turin a pe dawn tih a puang a. Heng zingah hian Nato member ni mek leh la ni lo, Russian-ten an nawr ve mai hlauhawm zinga mite pawh an tel a ni.
US Secretary of State Anthony Blinken chuan Ukrainian khawpui, Kyiv thlengin an thawhpui ramte chu Ukraine thawhpui ramte thlawpna kawngah tan la zel turin a ngen a, an thlawpna an tihlan dan pawh a mamawhtute mamawh thil azira insiam rem turin a ngen.
“Rang taka cheta kan invenna lamah Ukraine mamawh hmanruate pek thuai thuai a ngai a ni,” tiin Austin chuan a sawi.
Russia-in Kyiv a rûn chu ‘dan lo, mi awp tumna leh mahni inveng thei lo laka indona’ niin a sawi.
Indona hmunah
Nilaini khan Ukrainian President Volodymyr Zelensky chuan an sipaiten Ukraine chhim leh khawchhak lama ram zau tak thununtu, Russian sipai an beihnaah hlawhtlinna changin hmarchhaka Kharkiv khawpui hnaiha an awmhmunte an chhuhsak tih a sawi.
A kimchangin engmah a sawi lo va; mahse, Ukrainian leh Russian tantute pawhin Kharkiv chhimchhak lam km 60-a hla, Balakleya-ah inbeihna nasa tak a thleng ngei tih erawh an sawi ve ve.
Russian President Vladimir Putin erawh chuan Zelenskyy-a thu sawi hi a dik loh thu a sawi a, “Engmah kan chan lo va, kan chan dawn lo bawk,” a ti.