Aizawl: Sorkar hnathawkten a hun taka hlawh an lak theih nan mi thenkhatin voluntary pension an duh phah hial niin BJP Mizoram Pradesh President Vanlalhmuaka’n a sawi.
Zirtawpnia an pisaa mi thar lawm luhna hun an buatsaihah thu sawiin Vanlalhmuaka hian, tunah hian Mizoram sorkarin sum leh paiah harsatna lian tak an tawk a, tun thleng hian sorkar hnathawk hlawh an la pe kim thei lo chu a manganthlak thu a sawi.
Sorkar harsatna hrang hrang hriaa sorkar hnathawk thenkhatin voluntary pension hial an duh tih sawiin Vanlalhmuaka hian, “Sorkar hnathawk si, hlawh lak theih chuang si loh ai chuan keini tal hian sorkar hnathawkten a hun taka hlawh an lak theih nan tangkaina kan neih takin tiin voluntary pension pawh an duh phah hial a ni,” a ti.
BJP state president hian Mizoramin hma lam hun êng neih a duh a nih chuan party hrang hrangten an tih theih ve loh tih theihna neitu BJP an sorkartir a ngai a, mipui mamawh hrang hrang bakah sorkar hnathawk hlawh thleng a an harsatna tawh fo tihreh nan BJP hi an thlan tlin a ngai niin a sawi bawk.
State Kisan Morcha Adviser-ten tun hnaia an hmalaknate an tar lan danin Dampa biala Bawngthah khuaah state president-in mi thar a lawm luh bakah, Aizawl khawpui chhung bakah thingtlang hmun hrang hrangah BJP zawm duh an awm nual niin an sawi.