Aizawl : Zoram buai laia Administrative Officer (AO) hna chelhtu hrang hrang ten an tawnhriat an ziah te dahkhawmna bu DRDA Project Director, Champhai B. Lalchhawntluanga buatsaih ‘Zoram buai laia AO te’ tih chu nimin khan Champhai Bawrhsap James Lalrinchhana’n Champhaiah a tlangzarh.
Lehkhabu tlangzarhtu Champhai Bawrhsap chuan ‘Zoram buai laia AO te’ tih chu lehkhabu tha tak a nih thu sawiin, Zoram buai laia AO te tawnhriat hrang hrang ziaka dah a ni chu lawmawm a tih thu a sawi a. “Kan ram chanchin thangthar ten nakin zel thlenga an hriat theih tura ziaka dahthat a ni hi a finthlak hle a ni, a ti.
Champhai Bawrhsap chuan “Administration lama tawnhriat ngah leh sulsutu hma- sate zinga mi AO te thahnemngaihna hmanga Zoramin hun pawimawh a paltlang dan tarlante hian inrelbawlna kawnga thil thlengte chiang takin a tilang a, hun tawn ang zela insiamrem thiam thei tura zirtirtu tangkai tak a ni thei dawn a ni, a ti bawk.
AO te chu security force leh mipui inkara inhmuhthiamlohna awm theite chinfel kawnga theihtawp chhuaha thawk thinte an nih thu Champhai Bawrhsap chuan sawiin, chhuanawm tak tak pension an awm mek karah tha tak tak, sorkar tana tangkai tak tak an la awm chuan civil administration lamah awmzia a nei thui hle tih a sawi.
Champhai Bawrhsap chuan Champhai district mipuite chu lehkhabu ziaktute thawhrimna leh taimakna ngaihlu thiam tur leh thlawp tlat thin turte, lehkha ziah leh chhiar uar thar leh turtein a chah bawk a ni.