Hnehna chang veka season bul an tan hnuah Manchester United lakah chesual mahse Arsenal an tho lehnghal a. UEFA Europa League Group A inkhelah 2-1 a hnehna changin bul an tan.
Ningani zanah Kybunpark-ah Gunners an lenglut a. Tun nipui a Sao Paulo atanga an lakluh Brazilian rawlthar Marquinhos chuan minute 16-naah goal hmahruai a khung.
He goal hi halftime dawnah Zurich in an sut a. Fidan Aliti penalty hlawhchhuah chu Mirlind Kryeziu chuan goal-ah a chantir.
Second half-ah erawh Marquinhos bawk langsar lehin a goal khung tur siamsaktu Edward Nketiah goal khung tur a siamsak ve lehnghal.
Arsenal hian first half an thunun hneh viau a, second half-ah pawh danglam lovin an khingpui Swiss club lakah an chungnung tluan.
Inkhel dangah Manchester United erawhin hnehna nen bul an tan thei lova. Spanish club Real Sociedad hmachhawnin 1-0 in an tlawm.
Old Trafford a Group E inkhelah United hian an mikhualte lakah hian bul tan chhe lo mahse goal an khung thei lova. Tunhnaia Premier League a an khelhtir thin Starting XI an thlak danglam chu an tuar tih an inkhelah a lang.
Inkhel an kaihruai hneh tawk lo fo thin a. Goal hlauhawm mumal insiam an harsat bawk.
Minute 36-naah tun season-ah a vawikhatna atana inkhel bul tan Cristiano Ronaldo chuan goal khungin tauh lut mahse offside avanga pawm a ni lo.
First half a goal a luh loh hnuah Erik ten Hag-a’n a player-te a thlak kual a, Christian Eriksen leh Diogo Dalot te hahdam tirin Lisandro Martinez leh Bruno Fernandes a dahlut.
Mahse awmzia a nei thui lova. Minute 58-naah David Silva chuan Martinez ball pet perin referee in sawihlawh takin penalty a pe a. Brais Mendez chuan goal-ah a khung.
La Real hian a vawikhatna atan Europe huap inelnaah away inkhel a English club an hneh hmasak ber a ni bawk.
Europa Conference League lamah West Ham United in Romanian club FCSB an mikhual a. Jarrod Bowen, Emerson leh Michail Antonio ten goal khungin 3-1 in an chak.