Mizoram leh Assam inkar ramri chin fel dan kawng zawng tura Mizoram sorkarin a din, Boundary Committee chu a tum lina atan nimin khan Forensic Science Laboratory Conference Hall-ah an thukhawm a, state pahnihten ram an hauh chin ve ve a hmuna endik turin joint verification neih an duh.
Deputy Chief Minister Tawnluia kaihhruai thutkhawmah hian minister pali – Lalchamliana, K. Lalrinliana, Lalruatkima leh TJ Lalnuntluanga te an tel a, anni bakah sorkar hotu, Kolasib leh Mamit district bawrhsap leh committee member – MZP, MHIP, MUP, JAC on ILRFD , MNF leh ZPM aiawhte an tel a, committee member zinga mi – PC, BJP leh Congress aiawhte erawh an tel lo thung.
Thutkhawm chuan kumin October thla chawhnu lama Guwahati, Assam-a Mizoram sorkar leh Assam sorkar aiawhte inbiak huna an thu ken turte leh thil pawimawh dangte an sawiho a, he inbiakna neih turah hian State Boundary Committee-in an buatsaih, ‘Approach Paper’ chu Mizoram aiawhten tanchhan atan hmang se an tih bakah state pahnihten ram an hauh chin ve ve a hmuna endik turin joint verification neih ni se an ti bawk a ni.
Boundary Committee thutkhawmah hian thurel tura chhawp chhuah, August 9, 2022-a Mizoram leh Assam sorkar aiawhte Aijal Club-a inbiak tuma thuchhuah intawm an siam chu an thlirho a ni bawk.
He thutkhawma tel pawl leh party hrang hrang aiawhte chuan agenda chungchang an sawi bakah ramri buaina chin fel thuaina tura inremna neih vat an duh thu uar takin an sawi hlawm a ni.
Thutkhawma an tar lan danin August thlaa state pahnih aiawhte thuchhuah intawm bawhzuiin August 24, 2022 khan Kolasib, Mamit, Cachar, Karimganj leh Hailakandi Deputy Commissioner-te chuan 225 CRPF Camp, Vairengteah an inkawm tawh a, thla thara state-level inbiakna neih a nih hnuah inbiak chhunzawm an tum a, Boundary Committee thutkhawm hnuhnung ber, November, 17, 2021 hnu khan state pahnihten minister-level virtual meeting vawi thum an nei tawh bawk.
Boundary Committe thutkhawm hmasa ber hi July 30, 2021 khan neih a ni a, thutkhawm vawi hnihna hi September 7, 2021 khan neih niin a vawi thumna chu November 17, 2021 khan neih a ni.