India chu 2021 global Human Development Index (HDI)-ah ram 191 zingah 132 a hauh pha a, kum 2020 aiin dinhmun pakhatin a hniam zawk tih United Nations-in mihring dinhmun a tehnaah report a siam tharah tar lan a ni.
Asia khawmualpuia economy lian ber pathumna hi 2021-ah hian a HDI chu 0.633 a ni a, kum 2020 khan 0.642 niin a tawlhhnung a. Asia chhim lama a thenawm hnaia awm – Bangladesh (129-na), Bhutan (127-na), Sri Lanka (73-na) leh China (79-na) a phak lo hlawm a. Switzerland chuan HDI value 0.962 neiin dinhmun sang ber a hauh a ni.
Ramin sum a thawh chhuah ni lo, thil dang pathum hmangin HDI hi teh thin a ni a. An tehna hi — dam rei zawng, mi chengten sikul an kai rei zawng kum leh mi nawlpui sum lak luh atang a ni.
Hetianga teh hian India HDI value chu 0.633 a ni a, chu chu ‘mihring than dan a laihawl’ niin report-ah hian tar lan a ni.
India hi sum leh pai dinhmunah thang chak hle mah se khawsak dan a hniam a, sikul lam leh hriselna lamah a thang lem lo va, mihring tihhmasawnna lamah tan lak a ngai niin mi thiamte chuan an sawi.
Kum hnih a zawnin India hi a hniam zawngin a kal tawh a ni.
Indian-te hi kum 2021 khan an dam rei zawng chawhrual chu kum 67.2 a ni a, kum 2020 khan kum 70.1 a ni thung tih report-ah tar lan a ni a. Miin sikul a kai rei zawng pawh kum 2021 khan kum 11.9 a ni a, hei hi kum 2020 nen a la inang thung.