Aizawl : Mizo Hindi zirlai pawl (MHZP)-in recruitment rules kalha CSS Hindi teacher lak an nih thu sawiin, ram leilung fa ni lo; Mizo tawng thiam lo, trained an nih avanga lak mi 2 làk an nih thu an sawi a. Hemi chungchangah hian tunkar Thawhtanni khan Chief Minister leh Education Minister pawh an hmuh thu an sawi.
MHZP chuan ram leilung fa aia hnamdang duhsak an ni chu hriatthiam har an tih thu sawiin, ram leilung fate chanvo chhuhsak chu nakin zelah ram leh hnam tan a him dawn lova an hriat thu an sawi a. August 2022 chhung ngeia ban an nih theihna tura hma la turin Chief Minister leh Education Minister chu an lo ngen tawh tih sawiin, hemi chungchang hi Samagra lamin an ngenna avangin tun thla ni 16 thleng an ngaichang leh dawn niin an sawi bawk.
Recruitment rules kalha ram leilung fa te chanvo chhuhsaka CSS Hindi teacher lak chu zirlaite hmakhua atan pawha pawi thei a nih avangin chak leh zuala hma la turin sorkar an ngen tih MHZP chuan an sawi a. He thil ah hian a khawihtute zingah inphum ru an awm em ni? tih chu an zawhna a nih thu sawiin, “Kan ram leh hnam hmangaihna rilru pu lo, ram leilung fate chanvo chhuhsak pawh pawi ti lo an awm a nih ngat chuan MHZP chuan a enliam dawn lova, an chungah action lak a nih theih nan a tul angin hma a la dawn a ni” an ti.
Samagra-in a ngenna anga chawlhkar hnih chhung an nghah leh hnua recruitment rules kalha lak CSS Hindi teacher te ban an la ni lo fo a nih chuan an thiam angin hma an la zui dawn niin MHZP chuan an sawi bawk a ni.