Aizawl: Ram hmasawnna atana hmalakna chu ramngaw leh nungcha humhalhna nen a inkalh lo niin Chief Minister Zoramthanga’n a sawi.
Science Teachers’ Association Mizoram (STAM)-in General Conference, Synod Conference Centre-a neihah khuallian niin Zoramthanga hian a hmanpui a. “Ram hmasawnna atana hmalakna chu ramngaw leh nungcha humhalhna nen a inkalh ni loin, a kal kawp theih dan zawn zel a pawimawh a. Thil tihdan phung tha lo te, kan thil hman environment tana tha lo (eg. plastic, etc) te pawh a thlakna tur a awm theih zel dan leh, ngaihtuah chhuah zel a tul a ni,” a ti.
CM hian zirna kawnga hma a sawn theih nan sorkarin theihtawp a chhuah dan te, zirtirtu leh mamawh dangte phurhu tura hma lak zel a nih tur thute sawiin, NIT a nih dan tur ang taka din a nih theih nan theihtawpa a umpui tur thu a sawi.
Khual zahawm, School Education Director Dr. H. Lalthlangliana chuan zirtirtu indaih lohna phuhruk tura sorkarin hma a laknaah lawmthu a sawi a. Zirtir hna chu missionary nen khaikhinin khawi pawh ni se, hmanrua a tha emaw, tha lo emaw, inpekna rilru nen zirtir hna thawk zel thin turin zirtirtute a chah.
STAM-in magazine a buatsaih, Mizoram Science Journal-a thawhhlawkte tan award sem a ni a. Dr. Krista Roluahpuia, Asst Prof., IIT Gandhinagar chuan Best Contributor Award dawngin, Dr. Jehova Ringzuala, Trinity Hospital chuan Best Article Award a dawng.