India sorkar chuan September 11 hian Britain ram lal, Ningania thi ta, Queen Elizabeth II sunna hun a hmang dawn.
Ministry of home affairs-in Zirtawpnia thuchhuah a siamah he niah hian hnam puanzar chu ram pumah a ngul chanvea zar a ni ang a, sorkarin intihhlimna a huaihawt lo bawk ang.
“Her Majesty Queen Elizabeth II, United Kingdom of Great Britain leh Northern Ireland chu September 8, 2022-ah a thi a. Amah zahna leh uina lantir nan India sorkar chuan September 11 hian India pumah sunna hun hman turin a ti,” an ti.
“He mi niah hian ram pumah hnam puanzar chu a ngul chanvea zar a ni ang a, sorkarin intihhlimna reng reng a buatsaih lo vang,” a ti.
Kum 96 mi, Queen hi kum eng emaw chen atanga a hriselna dinhmun a hniam zel hnuah Ningani chawhnu khan ‘thlamuang takin a chawl ta’ a, kum 70 zet an ramah ro a rel.
Buckingham Palace chuan lal thar atan King Charles a nih thu a puang tawh a, lal chhungkaw dangte chuan a vui hnu atanga ni sarih chhung an sun ang.
A vui hun hi puan chian a la awm lo va; mahse, September 19-ah a nih rin a ni a. He hunah hian ram hrang hrang hruaitute pawh an tel tura ngaih a ni.
Khawvel huapa mi mal hriat hlawh ber tling phak, Queen hi British lal zinga hriat hlawh ber a ni a. Mi tam takin an ui thu an sawi a, Russia leh China atang pawhin an sawi hlawm.