Britain lal ni rei ber chu a liam ta a, a vui hun tur engmah puan a la ni lo va; mahse, ni reilo te hnuah engkim a chiang ang.
Scotland zinkawng
Queen kuang hi Balmoral estate atangin ni reilo te hnuah Edinburgh-a Palace of Holyroodhouse-ah lak a ni dawn a, hei hi Scotland-a British lalte chenna hmun a ni.
Heta tang hian a thlahna hun hman a ni dawn a, St Giles’ Cathedral-ah lak a ni ang a, hetah hian darkar 24 chhung a awm ang a, vantlangin a kuang an en theihna hun hawn a ni ang.
London khawpuiah
Vui a nih hmain Queen ruang hi Westminster Hall-ah ni li vel chhung zalh a ni dawn a, hetah pawh hian vantlang tan zahna leh thlahna hun an hman theih nan hun hawn a ni ang.
An dahna tur hall hi Britist sorkar rorelna leh inkulhna hmunpuia awm, Palace of Westminster an tiha hall upa ber a ni ang.
He hall lal chhungkaw ruang an zalh hnuhnung ber chu kum 2002-a Queen Mother kha a ni a, mi 2,00,000 chuang a kuang en tumin an intlar a ni.
Queen kuang hi chhuat atanga dawhsan siam, catafalque an tihah dah a ni dawn a, hei hi kum zabi 11-naa sak tawh hall chung, thing tha bika siam chungah tihna a ni a. Dawhsan kil tin hi sipai, Royal Household unit-a miten an veng dawn a ni.
Buckingham Palace atangin Westminster Hall-ah a ruang hi muangchanga lak luh tur a ni a, hetah hian sipaiin kalrem lâm nen an zui ang a, lal chhungkaw member an tel bawk ang.
An kalkawngah hian a sirah mipuiin an lo thlir thei dawn a, hei bakah hian London-a Royal Parks-ah en theihna tur screen lian zar a ni bawk ang.
A kuang hi Royal Standard-a tuam tur a ni a, Westminster Hall-a an zalh hnuah a chungah Imperial State Crown, orb leh sceptre dah a ni tel ang.
Vui hun
Queen vui hun hi chawlhkar hnih aia rei lova neih tura rin a ni a, Westminster Abbey-ah vui a nih rin a ni a. A ni tak hi Buckingham Palace-in an la tichiang ang.
Abbey hi biak in chanchin ngah tak a ni a, Britain-a lal leh lalnu ten lallukhum an khumna hmun a ni a, Queen ngei pawh hi kum 1953-a lallukhum a khumna hmun a ni a, Prince Philip nena kum 1947-a an inneihna biak in a ni bawk.
Kum zabi 18-na atang khan Abbey-ah hian lal an vui ngai tawh miah lo va, lal lamhnai vui hnuhnung chu kum 2002-a Queen Mother vui kha a ni.
Queen vuinaah hian khawvel ram hrang hranga hruaitute an tel tura ngaih a ni a. UK-a politician hlun leh prime minister hluite pawh an tel beisei a ni.
Vui niah hian Queen kuang hi Westminster Hall atangin Westminster Abbey-ah Royal Navy ta, State Gun Carriage hmanga phurh thlen a ni ang.
Gun carriage hi hman hnuhnung ber chu kum 1979-a Prince Philip-a patea, Lord Mountbatten vui kha a ni a Royal Navy-a lawng sipai 142 zetin an hnuk.
Lal chhungkaw miten a kuang phurtu hi an zui ang a, hetah hian lal thar pawh a tel rin a ni.
Vuina inkhawm hi Dean of Westminster David Hoyle-a’n a kaihhruai ang a, Archbishop of Canterbury Justin Welby-a’n thuchah a sawi ang a, Prime Minister Truss-i pawhin thuchah tawi a sawi rin a ni.
Vui inkhawm zawhah hian Queen kuang hi abbey atangin London khawpuia Hyde Park Corner-ah kea zawn chhuah a ni ang a, sakawr tawlailirin Windsor panpui leh a ni ang.
Queen kuang hi a tawp nan hemi chawhnuah hian Windsor Castle-a St George’s Chapel-ah phurh luh a ni dawn a ni.
Windsor Castle-a Quadrangle-ah hun hman leh a ni ang a, hetah hian King leh lal chhungkuaa langsar chin an tel ang a, heta tang hian St George’s Chapel chu panpui chauh a ni dawn a ni.
St George’s Chapel hi lal chhungkuain inneih, thil lawm leh invuina atana an thlan fo thin a ni a. Duke leh Duchess of Sussex, Prince Harry leh Meghan te pawh he hmuna innei hi niin Queen pasal, Prince Philip pawh he hmunah hian vui a ni.
Queen kuang hi Royal Vault-ah luhpui leh zawk a ni ang a, hemi hnuah hian St George’s Chapel-a King George VI memorial chapel-ah phum a ni ang.
Queen kuang hi Royal Standard-a khuh dawn a, a chungah Imperial State Crown dah a ni ang.
Royal Standard hi ram hran leh UK entirna a ni a. Puanah hian England pualin rangkachak sakeibaknei pathum, Scotland pualin sakeibaknei sen leh Ireland pualin tingtang lian a awm.
Imperial State Crown-ah hian a hma takah Prince ruby dum a awm a, a chhip-ah St Edward-a sappire a awm a. A tlang kualah khawvela lunghlu tlang lian ber atanga hleh thlak, Cullinan II a awm thung.
Palace of Westminster-a kuang chungah Soveriegn’s orb leh sceptre dah a ni dawn bawk a. Orb hi khawvel lem, a chunga kraws awm a ni a, Kristian khawvel entirna a ni a. Sceptre hi rangkachak tiang, cm 92-a sei a ni a. Cullinan lunghlu leh lungman tam danga chei a ni.