Queen Elizabeth II, UK-a lalna dinhmun chelh rei ber chu kum 96 mi niin Balmoral-ah a thi a, kum 70 zet ro a rel.
Nipuia a hun tam tak a hmanna, Scottish estate-ah hian Ningani chawhnu khan hahdam takin a thi tih puan a ni.
Queen hian kum 1952 khan lal thutthleng luah tanin a hun chhungin vantlang leh khawtlangah thil inthlak a tam hman hle.
A fapa, a thih tak avanga lal nihna chelh zui nghal, King Charles III chuan a hmangaih tak a nu a thi chu ‘amah leh an chhungkaw tan lungngaih ber hun’ a nih thu a sawi a, khawvel hmun hrang hrangah ‘an ui hle’ niin a sawi bawk.
“Roreltu duhawm leh hmangaihna ngah nu kan sûn a. Ram pum bakah Commonwealth leh khawvel hmun hrang hranga chhiarsen rual loh miin an ui a ni,” a ti.
King leh a nupui, Camilla, Queen Consort ni ta chu lalnu thihna hmuna an kal hnuah Zirtawpni khan London-ah an let leh niin Buckingham Palace chuan a puang a. Lalpa hian mipuite hnenah thuchah a sawi zui.
Ningani chawhma lamah khan Queen enkawltu doctor-ten a dinhmun a hniam nia an sawi avangin lal chhungkuaa langsar tak takte chuan Balmoral hi an pan khawm.
A fate zawng zawngin Aberdeen bula Balmoral hi an thleng.
A tupa, nakina lalna la chang tur, Prince William leh a nau, Prince Harry pawh an tel.
Thawhlehni maia Queen-in prime minister atana a ruat hlim, Liz Truss-i chuan lalte chu tun laia Britain ram din theih nana lung pawimawh an nih thu a sawi a, “Kan mamawh ngialnghehna leh chakna tur min petu a ni,” a ti.
Lal thar chungchang pawh sawiin, “A nu laka kan tih ang bawkin a laka rinawmna leh zahna kan lantir zel dawn a ni,” a ti.
“Elizabethan kum pahnihna a liam a, Her Majesty-in a duh angin kan ram ropui tak chu bung tharah kan lut dawn a, kan lo sawi thin angin ‘God save the King,’” a ti.
Lalin thuneihna a channa, Church of England-a an thlarau lam hruaitu, Archbishop of Canterbury Justin Welby chuan lalnu an chân ta chu lungchhiatthlak tak zet a tih thu a sawi.
Lalpa leh lal chhungkaw tan a tawngtai tih a sawi bawk.
Queen Elizabeth II hi Indopui II-na hnu hret atanga an ram hotu ber nihna dinhmun chelh tan a ni a, an ramin khawvel ram zau tak a awp atanga insawi zim zelin Commonwealth-a an luh te, Cold War vanglai leh a tawp leh European Union-a UK-a a tel ve tan leh a chhuah leh zawng zawng laia an ram hotu ber a ni.
Lalnu thutthleng a luah chhung hian prime minister 15 zet an awm hman a; kum 1874-a piang, Winston Churchill-a atanga tanin Churchill-a aia kum 101 zeta naupang, Truss-i thlengin an ni.
Lal ber nihna a chelh chhung hian chawlhkar tin prime minister nen an inkawm ziah bawk.
Heti taka lal rei a nih avang hian a ram mipuite ngainat pawh a hlawh a, Ningani chawhmaa a dinhmun a tha vak lo tih puan a nih atang khan London-a lal inpui ber, Buckingham Palace tualah chuan a chanchin ngaichangin mi tam tak an inhawr khawm a ni.
An ram sanaa tlai dar 6:30-ah chuan palace chunga union flag an tar chu a ngul chanvea zar a ni a, lalnu a thi tih pawh puan zui nghal a ni.
Queen-a thih tak avang hian Prince William leh a nupui, Catherine chu Duke leh Duchess of Cambridge leh Cornwall an ni zui nghal.
Queen hi Elizabeth Alexandra Mary Windsor tih hming puin Mayfair, London-ah April 21, 1926 khan a piang.
A pian hlim hian lal a nih theihna remchang a awm mang lo va; mahse, December, 1936 khan a patea, Edward VIII chuan a lallukhum kalsanin pasal vawi hnih then tawh, American nuthlawi, Wallis Simpson-i neiin Queen chhungkua chu rorelna fawng vuantu an nih a ngai ta a ni.
Elizabeth-i pa, King George VI chu lal a ni ta a, hetih laia kum 10 mi lek, Lilibet tia a chhungten an koh chu a dawta lal tur a ni ta a ni.
Kum thum a liam leh chuan Britain chu Nazi Germany nena indonaah a tel ve ta a. Elizabeth leh a laizawn, Princess Margaret te chuan indo chhung hun tam zawk hi Windsor Castle-ah an hmang a, Canada-a awm tura rawtna awm mah se a nu leh pain an phal lo a ni.
Kum 18 a tlin chuan thla nga chhung Elizabeth-i hi Auxiliary Territorial Service-ah telin hetah hian lirthei siam dan tlanglawn leh a khalh pawh a zir.
Indo chhung hian an lamhnai deuh tho (third cousin) Philip, Prince of Greece nen lehkha an inthawn tawn reng a, ani hi Royal Navy-a tang a ni a. An induh chho zel a, Westminster Abbey-ah November 20, 1947 khan inneiin prince hian Duke of Edinburgh nihna a chelh zui ta bawk a ni.
Kum 2021-a kum 99 mi nia Philip-a’n a thihsan hma zawng, kum 74 zet an innei a, ‘ka chakna’ tiin Queen hian a sawi.
An fapa hmasa ber, Charles chu kum 1948 khan neiin kum 1950-ah Princess Anne a piang leh a. Kum 1960-ah Prince Andrew piangin a naupang ber, Prince Edward chu kum 1964-ah a piang thung a. Tu pariat leh tuchhuan 12 a nei hman a ni.
Lal a nih hma, kum 1952 khan Princess Elizabeth-i hi lal damlo chak lo tak aiawhin Kenya-ah a zin a, hetih lai hian Philip-a chuan a pa a thi tih a hrilh a, rang taka London pana kirin Queen a ni tan ta a ni.
Elizabeth-i hi Westminster Abbey-ah June 2, 1953 khan kum 27 chauh a nih laiin, hetih hun laia TV-a entu ngah ber nihna chelhin lallukhum khumtir a ni a, TV-ah hian mi maktaduai 20 chuangin an thlir a ni.
Kum tam tak a lal chhung hian khawmualpui danga British Empire hnuaia awm ram tam tak indangin ram thar a piang a. In lamah pawh lalte nunphung tam tak a thlak danglam bawk.
Elizabeth-i hian tun hma lama lalte tih ngai loh pawh ching tharin vantlang nen inhnaih zawkin a awm a, lal a nihna angin hmun tam tak a tlawh a, vantlang thiltihnaah pawh a tel tam hle.
Commonwealth ramte tan pawh a hlu a, heng ramte hi a lal chhungin vawi khat tal a tlawh vek hlawm.
Hetih rual hian a mi mal leh chhungkuaa hun hman leh chhungkaw thil a ngai pawimawh hle bawk.