Aizawl: Zoram People’s Movement (ZPM)-in sorkarna an chan chuan kalphung tha tak nen ram an kaihruai dawn niin an leader, Lalduhoma’n a sawi.
Zirtawpni khan Mizoram University, Department of Political Science buatsaihin Dean’s Multipurpose Hall, School of Social Sciences, MZU-ah ‘Political Talk’ hun hman a ni a. ZPM leader-in thu a sawi bakah zirlaite nen an inkawm.
Lalduhoma hian rorelna dik leh sorkar tha siam tur chuan politician-ten hma an hruai a tul tih a sawi a. Ram kaihhruaina kawngah Mizoramin kalphung tha a mamawh thu leh kalphung tha a awm loh avangin buaina a awm tih sawiin, “ZPM-in sorkarna a chan chuan kalphung tha tak nen ram kan kaihruai dawn a ni,” a ti a, inremchemna an kalpui tur thu leh MLA-ten sorkar atanga hamthatna an dawn thinte thlenga ennawnin, a zatvein an tihniam dawn niin a sawi.
Political party dangte aia ZPM danglamna sawiin, “Party sorkar aiah mipui sorkar kan din tur ringawt pawh hian danglamna tam tak a nei nghal dawn a. Chief minister-in works department a chang ve lo tur ringawt pawh hi danglamna a tling nghal. Tuna kan kalphungah chuan chief minister-in sum tamna department a chang a, chief minister-in PWD department a chan chat chuan a hnar atangin a nu leh dawn tih hi hre lawk ila, a dik ngei ngei a ni,” a ti.
Dr. Lallianchhunga, HoD, Political Science kaihhruai hun hmanah hian ZPM Leader Lalduhoma hi ZPM Working President K. Sapdanga, Dr. Vanlalthlana, MLA; Eddy Zosangliana Colney, General Secretary ten an tawiawm a. Zirlai naupangte nen zawhna leh chhanna hun an hmang bawk.