Mizo Girl Group Survival Show atanga kan lo hmelhriat Mizo Dance Camp Dancer ni bawk Asangi GT chuan Music Video thar a rawn tichhuak dawn ta. A hla hmasa ber tur hi ‘Chantir Rawh’ tih niin, Lal K Sailo phuah a ni a, Kings & Prophets a record a ni thung.
A music video atan hian Alan Rinawma director niin, Anthony Wowv Videography a ni thung. Music video hmuhnawm leh dangdai tak rawn chhawpchhuah a ni dawn a. Asangi hian a talent hrang hrang he MV ah hian a rawn entir dawn a ni.
Asangi GT hi Mizo Dance Camp Team ah 2017 khan Audition hmanga lakluh a ni a. Team Member a nih hnu hian Mizoram a event lian leh competition hrang hrang ah a lo tel tawh thin a.
Teacher training te nei chho in, MDC leh hmun hrang hrangah lam a zirtir tan a. Kan 2020 khan Manipur, WeDance Academy, Lamka ah Instructor angin thla 2 chhung a lo awm tawh bawk.
Asangi GT hi dancer angin Music Video 10 chuangah a lo lang tawh a, chung zingah chuan Feli Fanai, Zorinzuali Khiangte, Youngfella, KR Robert te pawh an tel a. Lil Kiki ‘Mi Rinawm’ MV ah khan amah a lam bakah Choreographer a ni nghal nghe nghe.
Tunah amah ngeiin MV a tichhuak ve dawn ta a, Zonet ah zanin 26.09.22 atang hian en theihin a awm ang a.
Youtube ah Thursday atangin en theihin a awm thung ang.