Tun thla ni 23-24 chhunga India ram state hrang hranga Environment, forest & climate change Minister te khawmpui Ekta Nagar, Kevadia, Gujarat-a neihah Mizoram EF&CC Minister, T.J. Lalnuntluanga’n Mizoram dinhmun tlangpui sawiin, mamawhte a thlen.
Sorkar thuchhuahin a tarlan danin, EF&CC Minister T.J. Lalnuntluanga chuan thuneitu sang zawkte chu Mizorama ecology leh economy than dan ngaihtuah chunga uluk taka enpui turte, green clearance buaipui chhung tirei lo tur leh tifel hma turtein a ngen.
Bawlhhlawh saw- ngbawl kawngah sorkar laipui nena thawhho a tul thu pawh sawiin, plastic chhiate chu state dangte ang bawka Mizoramah pawh buaipui a nih thute, Department dang buaipui ni mahse, a endik leh phalnate chu pollution ang emaw, EFF&CC hminga pek a ngaih thin avangin plastic chhia sawngbawlnate endik kawngah hmanrua leh thawktu tih tam a ngaih thu leh sorkar laipui nena thawhho a tul thu a sawi.
TJ Lalnuntluanga chuan Ramsar site atana Pala Wetland puan a nih avanga lawmthu sawiin, Tamdil Wetland pawh Ramsar site atana puang leh turin a dil a. Wildlife chungchangah Wildlife sanctuary chauh ni lova duty tur mamawh a nih thute a thlen bawk.
Mizoram chu ramri depa awm a nih avangin nungcha tawlhruk leh dan lova sumdawnna a tam thu TJ Lalnuntluanga chuan sawiin, “sahuanin dan neuh neuh a neih avangin nungcha tawlhruk mante dahluh mai a remchang lova, rescue centre tur atan sorkar laipui puihna an mamawh thu a thlen a. Agroforestry kaltlangin Mizorama kuthnathawktute hmasawn nan leh economy tihsan nana hma laksak turin a ngen niin sorkar thuchhuah chuan a tarlang bawk a ni.