Aizawl: Mizoram Pradesh Congress Committee (MPCC) President Lalsawta chuan thuneihna changa an sorkar chuan mipui rawng an bawlnaah mipuite tana a remchang thei ang zawng ber, awlsam leh nuam, dik leh thain kal an tum dawn tih a sawi.
Zirtawpni kaltaa Congress Bhavan-a chhung inkhawm an neihah thu sawiin Lalsawta hian, tun lai hian sorkar remhre lo luiin lirtheite pollution emission an buaipui kawngah sorkarin remruatna dang siam thei mah se, an rawngbawlsak, chhiah petute, an hlawh, an chhiah atanga an pekte hianin an rawngbawlsaka te hi an ngaihtuah lo hle nia a hriat thu a sawi.
Lalsawta hian, “Pathian zara kan sorkar theih chuan ‘ease of doing business’ kan tih, mipui rawng kan bawlna a, a awlsam thei ang zawng ber, a remchang thei ang zawng ber, midang tikhawlhkham lo leh mi dang tana harsa leh nghah rei ngaite emaw, heng ang chi zawng zawng hi tiboin, awlsam leh nuam leh dik leh thain tih kan tum dawn a ni,” a ti.
MPCC president hian thla hnih, thla thum lekah Krismas a lo thleng dawn a, hei hi MNF sorkar, Zoram mipuiin a tha lo an tih em em, mipui aia mahni inngaihsak, mahni dinchhuah tumte Krismas hnuhnung ber ni tur atan Congress party-in an siam thei nia sawiin, “Vawi khat chiah Krismas hi he MNF sorkar hnuaiah hian kan la hmang dawn,” tiin, theihtawpa tantlanpuiah Zoram mipuite a sawm a ni.