Kum 2025-a Mizorama Thingtam lo thleng tur bul intanna nia ngaih theih turin Mizoramah sazu a puang mek a. Agriculture department-in an chhinchhiah danin khaw 104-a thlawhhmaa buh chinte a bei tawh.
Agriculture department atanga thudawn danin tun dinhmunah Lunglei district-a khaw 29-ah sazu a puang mek a, thlawhhma a khawih ram zau zawng hectare 198 niin, Mizoramah sazu puan nasat berna district a ni rih.
District dang, Aizawl-ah khaw 13, Siaha district-ah khaw pakhat, Kolasib district-ah khaw pali, Serchhip district-ah khaw 11, Mamit district-ah khaw 19, Saitual district-ah khaw 16 leh Hnahthial district-ah khaw 12-ah te sazu a puang mek a ni.
Mizorama district pariata khaw 104-a sazuin thlawhhma a khawih ram zau zawng belhkhawm hectare 524.63 nia chhinchhiah a ni bawk.
Tar lan tawh thin angin agriculture department hotute chuan tun hnaia sazu a puan vak chhan chu kum 2025-ah rawthing tam tur sehsam nia an ngaih thu The Zozam Times an lo hrilh tawh.
Agriculture department hotute chuan mau a tam dawn reng rengin, mau a tam tak tak hma kum khat emaw, kum hnih hma lamah a sehsam awmin sazu a puang thin niin an sawi a. Chumi avang chuan kumin kumtir lam atang khan sazu puang beihna turin district tin agriculture office chu sazu tûr an lo thawn lawk tawh tih an sawi.
Tuna sazu puanna khaw hrang hrangah te hian district officer ten lo neitute hnenah Sazu tur an sem zel tih an sawi a, sazu tur hman dan tur chu lo neitute an zirtir zel bawk niin an sawi.
Mizorama sazu puan dan
District Khua zat Ram a beih zat (hactare)
Aizawl 13 18.5
Lunglei 28 198.0
Siaha 1 3.0
Kolasib 4 13.5
Serchhip 11 12.6
Mamit 19 255.7
Saitual 16 18.0
Hnahthial 12 5.33