Tunhnaia che tha lo tak England an mualpho a. UEFA Nations League-ah an group atang tla in Italy lakah an tlawm.
Zirtawpni zanah Milan-ah World Cup khel lo tur Italy hian England hi an mikhual a. Minute 68-naah Giacomo Raspadori chuan goal mawi tak khungin San Siro-ah Italy an chak.
England hi a zawna match nga chak hmel an hmuh lohna niin kum 2014 June thla hnua an chetchhiat rei ber a ni a. Italy lakah hian result tha neih beiseiawmin minute 90 chhung football an khel lo.
Inhliam Jordan Pickford aia khel Nick Pope-a tan Raspadori goal khung tur dan theih a ni lova. England tlarhnungah sawisel hlawh fo Harry Maguire chu Gareth Southgate-a’n a ring a, a tisual teuh. West Ham United striker Gianluca Scammaca chuan inkhel tan tir lamah tih thaihin ball kangah Maguire-a’n a veng zo lova. Nick Pope leh goal banin a mualpho tur a hliahkhuh hram.
England in huntawp dawn lamah chance tha an insiam thei chauh a. Harry Kane-a goal khung tur Italy goalkeeper Gianluigi Donnarumma in a dansak a tha hle.
“Kawng dik kan zawh”
England manager Gareth Southgate chuan result lawmawm lo nei mahse a team a sawisel na viau duh lo. “Kan inkhel han sel chiamna tur ka hmu lo. Ball kan chang tam a, chance tha zawk pawh kan nei. Khelchhe lutuk kan ni lo.”
“Tunhnaiah kan result a that loh avangin mi zawng zawngin an thlurbing a, kan inkhel thlir erawh chuan hmasawnna hmuh tur a awm. Player te khelhdan theuh thlirin kawng dik kan zawh tih a hmuh theih.” a ti.
Italy manager Roberto Mancini pawhin hnehna chang mahse a khingpuite chu a dah hniam lo hle.
“Kan tan result pawimawh a ni a, group hmahruaitu kan nih theihna kawng a inhawng. Khawvela team tha ber zing ami kan hneh thei.”
“World Cup an khel dawn, hei hi hmuh hmaih a thiang lo. Kan lakah tlawm mahse World Cup a team tha ber pawl ni turin theihna an la nei reng.” a ti.