Kum 1998 hnu lama a vawikhatna ni turin Sir Elton John-a’n White House-ah show a nei a, rimawi lama a thawhhlawk em vangin US President Joe Biden-a’n award a hlan.
Sawm bik mi sanghnih chuang zingah hian zirtirtute, nurse te leh LGBTQ tana thawk hlawk tak takte an tel a, nitina history siamtute hmaa a inlan thei chu inchhuanna tham a tling niin, Elton hian a sawi.
Show neih zawhah President Biden chuan sawilawk awm miah lovin National Humanities Medal a hlan nawlh mai a, inbarakhaihna duhawm tak a thleng.
Kum 75 mi Elton hian rimawi khawvela kum 50 chuangzet hlawhtling taka a lo tal tawhna tawpkharna ni turin farewell tour a kalpui mek a ni.
Sir Elton John hi khawvelin HIV/AIDS a hmelhriat tirh lam, nasa taka a thinhrik zual lai pawha he natna veite tana a taka penchhuak a, phar chhuak a, sum leh pai tam tak thawkchhuak a, an tana inpezo milar hmasa ber pawl a ni.